Den e ultimo lunanan no ta bay cu auto pasobra no tin luga mas, despues cu polis para un persona cu no tin rijbewijs of seguro. Tambe ta haya instruccion di ariba cu no tin luga, pa no bay cun’e. Of ta pone e auto un banda of ta busca un hende cu rijbewijs pa bay cu e auto.
Segun Alto Comisario Andrew Hoo, core sin rijbewijs of core sin seguro, keuringskaart, ta castigabel. Loke ta pisa mas ta coremento sin rijbewijs of core sin seguro. Semper en cuando lo ta bon pa e polis kita e auto for di caminda e ora ey te ora e papelnan wordo regla.
Tin un problema si cu en berdad no tin luga na e wardanan of warda di Balashi, pasobra tur luga ta yen. No ta door di kitamento di auto so. Tin hopi investigacion cu ta andando di parti di departamento di husticia. Tambe accidentenan cu morto tambe tin cu haci investigacion riba e autonan. Esey tambe ta yena e wardanan. Esey tambe ta tranca e proceso. Hopi biaha tin cu ward te ora e caso bin dilanti te ora cu hues dicidi kico lo haci cu e autonan. Esey ta wanta man hopi y e autonan ta keda acumula. Los di violacionnan caminda cu polis ta kita auto, tin esunnan di investigacionnan cu ta andando, cu por dura casi of mas cu un aña. Tin hopi auto riba Aruba, segun Hoo. Tin un gran parti di nan cu no ta cumpli cu regla manera seguro, keuring, etc. Esey ta pasa cu e wardanan ta cuminsa yena e ora.
Mester tin un manera
Un idea lo ta pa centralisa tur cos. Pa kita e presion di e wardanan. Por tin por ehempel un opslagruimte apart, cu no ta na e wardanan, unda cu por warda e vehiculonan. E proceso mester cana mas lihe. E parti di otorgamento di boet, ora cu yega na warda, ta traha un proces verbaal. Despues e tin cu cana su caminda pa bay ministerio publico. Tin biaha e proceso por bay tiki mas lihe. Hoo ta haya cu mester hisa e tarifa di boet tambe. Ora cu nan cuminsa sinti den nan cartera, nan lo bay percura pa cosnan wordo regla. Tin cu sinta hunto un biaha mas pa delinea cierto reglanan con ta bay versoepel e proces aki pasobra awor aki e ta tranca.
Contacto cu asociacion di seguro
Hoo a splica cu tin cierto funcionarionan cu ta sinta hunto cu e asociacion di seguro pa delinea cierto richtlijnen.
Limpiesa na warda
Esaki ta un trabao den proceso. Tin cierto cosnan cu inventario tin cu wordo haci, kico por bay di biaha y kico tin cu warda un rato. Esey ta e proceso cu ta andando, segun comisario Hoo.
