Rocco Tjon ta lider di fraccion di MEP. E tabata tambe director di KIA recientemente. Durante algun pregunta haci, a splica cu te asina leu cu e sa, e posicion di director a wordo habri.
E procedura di solicitud a cuminsa. Awor aki e ta na e comision pa bay nombra un director nobo. Esey ta encaminando.
E Parlamentario a agrega cu e prizon no tin di haber cu persona A ta pensa cu esaki ta bon, of persona B of persona C. Tin criterianan internacionalmente defini, na cual abo como instituto mester mantene bo mes na dje. Aspectonan di siguridad, aspectonan di programanan cu bo ta brinda na e detenidonan. Aspectonan di personal, di maneho y integridad. Vooral riba e aspectonan aki ta hopi importante, particular den un instituto Coreccional. Hopi hende cu no ta biba, cu no a biba e mundo ey, no ta compronde, cu un trahado di prizon ta hopi mas vulnerabel. E ambiente den cual e ta traha ta hopi mas pisa cu cualkier otro profesion. P’esey e aspectonan huridico pa e trahadonan pa nan ta bon regla ta hopi importante.
E formatie plan
E minister actual di husticia tin e formatie plan. Tjon a menciona, cu door cu e traspaso di mando tabata asina malo, e minister actual no a haya tur e documentonan for di e minister anterior. Ta Tjon mes a dun’e tur e documentonan aki, cual ta algo condenabel. Na fin di dia, si bo tin KIA na pecho, bo mester percura tambe pa tur e documentonan aki a wordo traspasa pa e minister actual, pa e proceso cu a bisa cu ta encaminando y bayendo den bon direccion, por sigui wordo finalisa tambe. E minister actual ta bezig cu e sindicatonan, pa awor aki termina cu e proceso ey y por cuminsa implement’e tambe.
Guia di e preso
Mester yega na un KIA nobo cu por acomoda no solamente detenidonan, pero cu por brinda tambe e cursonan, e programanan necesario pa e detenidonan por integra na un manera exitoso.
Hopi biaha ta pensa cu ta bay brinda detenidonan programanan cu ta costa pueblo placa, mester inverti e placa na un otro manera. Pero na fin di dia, ora cu brinda un detenido programanan, e no ta bon solamente pa e detenido, pero pa pueblo tambe. Un detenido cu integra bek den comunidad, cu no ta bay comete delitonan atrobe, na fin di dia ta pueblo ta beneficia di dje. Ta hopi importante tambe pa e trahadonan den KIA pa e detenidonan tin algo positivo pa haci. Si nan no tin esaki pa haci, na fin di dia, e stress y e peso ta cay bek riba e trahadonan di KIA.
Mester separa detenidonan
Den tur prizon internacional bo mester separa detenidonan muhe for di detenidonan homber. Adulto for di menornan. Pesey e unidad di informacion den KIA ta asina importante. Nan ta traha analisisnan, no solamente di kico ta sosode den KIA, pero tambe informacion cu ta p’afo di KIA, pa asina nan por percura cu miembronan kisas di diferente partinan na Aruba, di diferente districtonan cu tin problema cu otro, gangnan por ehempel, pa nan tambe wordo separa for di otro. E tipo di casonan, pa loke ta zedendelicten, tambe semper nan ta wordo separa for di e restonan, pa evita confrontacionnan, pa evita violencia inecesario den e instituto coreccional.
Estudionan cu a yega di wordo haci riba e aspectonana ki, na tur parti di mundo, a prueba esaki y pesey bo ta tuma precaucion semper pa separa e grupo specifico aki (esta pedofil) for di e resto di populacion di detenidonan, Tjon a menciona.
