Guilfred Besaril, kende originalmente ta un Polis, a bira conoci como Presidente di Sindicato di Polis (SPA) y desde aña 2013 ta milita riba lista di MEP pa cual el a drenta Parlamento. Den su prome salida el a logra no menos di 833 voto. Den e ultimo eleccion, su votonan a baha na 508. Awe el a huramenta como Minister Plenipotenciario, cu ta staciona na Den Haag, Hulanda.
Ta bon pa splica cu un Minister Plenipotenciario no ta un “Minister” igual cu e otronan pasobra e no ta responsabilisa na Parlamento, sino ta raporta directamente na e Minister Presidente. E ta forma parti di Conseho di Minister di Reino na Hulanda pero no ta forma parti di Conseho di Minister di Aruba. Por invite pa atende si ta necesario. Entre su trabounan lo figura e Arubianonan residencia eynan, e enfermonan cu ta bay pa tratamento medico, e studiantenan, e relacion cu Gobierno di Reino Hulandes y ta fungi tambe como e representante di Aruba na Hulanda pa tur oportunidad commercial y industrial.
Guilfred Besaril ta reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba.
