Hopi hende ta manda placa afo y por tin un efecto riba nos. Tin manera por controla esaki. Prome Minister Evelyn Wever-Croes a splica cu na Aruba tin un mercado di capital practicamente liber. Bo ta gana bo cen y abo ta dicidi kico bo kier haci cun’e. Si bo kier bo ta pone na banco, of bo ta gast’e na Aruba, si bo kier bo ta mande afo of scondi’e bao di matras.

Usualmente paisnan tin esaki, esta mercado di capital liber. Ora cu ta den un situacion hopi critico manera Venezuela, bo ta bin cu limitacionnan riba cuanto placa bo por saca, cuanto placa por bay afo. E caso di Aruba, sa cu tin hopi placa ta bay afo. Tin paisnan cu un pilar economico ta e placa cu nan ta haya di Aruba. Pero e no ta un cos cu bo por bisa cu ta necesariamente negativo.

Con bo por haci pa wanta bo cen na Aruba den un caso asina?

Esey ta un punto cu gobierno kier bin cun’e. En bes di cada biaha busca hendenan di otro pais pa bin yuda nos, desaroya nos economia, nos percura pa nos mesun hendenan yuda nos desaroya nos economia. Tin varios persona na Aruba mes cu ta sin trabao y cu nan por ocupa cierto trabaonan cu no mester busca hendenan di afo.

Si bo no busca un hende di un otro pais, e no mester manda placa pa otro pais, e ta keda Aruba.

E di dos ta busca Arubianonan cu ta den exterior. Esey ta exactamente e plan cu ta yama District 297, cu ta bay lansa e fin di siman aki, durante Arubadag na Hulanda. Arubadag na Hulanda ta un momento hopi unico. E ta e momento cu como Arubiano bo ta biba hopi leu di bo pais, talbes hopi aña. Pero ta momento cu como Arubiano bo ta bin hunto. Bo ta pasa momentonan hunto, bo ta intercambia di idea y bo ta tende, bo ta scucha kico ta pasando na bo pais. Bo ta haya e lasonan ta wordo estrecha cu bo pais.

Prome minister tin un mensahe cu lo wordo transmiti durante e celebracion, caminda cu e ta bay splica nos Arubianonan na Hulanda, cu berdad ta cu nos pais ta pasando den un crisis, pero cu e gobierno aki ta atendiendo cu e crisis y ta preparando e pais aki pa nan cuminsa bin bek. Ta pidi nan pa prepara nan mes bon, y prepara pa nan bin bek Aruba.

Nan no ta biniendo Aruba bek pasobra no tin oportunidad pa nan. Wel ta creando oportunidad pa nan. Irespecto unda cu bo ta biba na mundo, bo ta pertenece na e districto 297, e districto di Aruba, e pais Aruba. Bo tambe ta un di esnan cu bo por bin yuda engrandece nos economia, engrandece nos pais. Loke kier ta pa nos hendenan bin bek. Tin hopi studiante cu a bay y no a bin bek. Nan kier pa bin bek. Una bes cu nan bin bek, nan ta establece akinan cu nan famia. Nan ta contribui permanentemente na e desaroyo di nos economia y e placa no ta bay afo mas.

Kiermen, esakinan ta ideanan talbes chikito, pero e ta e manera cu bo ta conserva tambe loke ta dibo, pa bo mesun hendenan y pa bo futuro generacion.

Garantia di trabao

E anuncio cu prome minister lo haci na nan cu Districto 297, ta un proyecto cu lo bay entama, caminda cu tin cu match loke ta e demanda y loke ta e pedido. Na Aruba nos sa kico nos mester. Eynan, nan sa kico nan tin, pero no sa ken nan ta, pasobra no tin nan registra completamente. Arubahuis tin algun di nan registra, pero kier pa tur registra nan mes. Kico ta nan preparacion, kico ta nan deseo, kico ta loke nan ta spera y mira con por match’e aki na Aruba.

Minister di Asuntonan di Labor, Glenbert Croes a puntra esey tur ora. Minister di Salubridad tin e mesun pregunta. Si e mester busca un oncologo, e ta haya un proposicion pa tuma un persona por ta Hulandes, of un persona por ta di Colombia, e ora e tambe kier sa si tin un Arubiano cu ta kedando cla den algun tempo. Si ta asina, bo ta duna e persona cu bin di exterior un contract di tres aña, pa e ora e Arubiano cu ta studiando na un otro pais, e keda cla, e bin bek, e ta sigura di un trabao y abo como un minister encarga cu esun cu ta duna e permiso, tabata responsabel bezig pasobra cu a limita e permiso pa locual cu realmente tin mester.

Pesey Districto 297, ta un proyecto cu e minister ta kere hopi den dje. E hobennan cu tin den su servicio ta conseha y esaki por bin cu su fruto.Den e mesun rosea, Prome Minister ta haci un apelacion na comunidad cu tin famia den exterior, yiunan cu ta studiando of trahando, tambe. Ora cu anuncia esaki y bisa kico ta e puntonan di contacto, tuma contacto, registra bo familiar cu ta den exterior, kico ta su preparacion, kico ta su ambision, pa asina cuminsa match nan, y pa trece nos hendenan bek. Si haci esaki conhuntamente uni, ta logra. Mescos cu e prome minister ta bisa tur ora. E retonan di nos pais ta serio, pero a yega den retonan pio. A pasa den e temporada cu Lago a cera riba nos, a drenta den Status Aparte, den temporada di insiguridad enorme. Pero tabata tin un lider cu a sa di uni e pueblo aki. Aunke cu e no tabata tey presente na momento cu a drenta den Status Aparte, Betico Croes a haya accidente caba. Ta sigur cu danki na su esfuerso, e empeño cu el a pone pa uni e pais, a pone cu awo nos ta para riba nos pianan. E mesun union ey, por logra y cu e union aki lo surpasa tur reto cu tin nos dilanti.