Diamars den oranan di merdia a tuma luga un reunion di urgencia, aunke e presidente ta bisa cu esaki no ta e caso, cu su miembronan pa trata diferente tema di importancia no solamente pa e miembronan di SPA pero tambe pa e Cuerpo Policial en general.
Na final di reunion tin miembro a sali pafo bisando cu tin un mocion di desconfiansa a wordo entrega y pasa contra e presidente y su directiva, mientras cu e Presidente mes, Edgar “Efa” Maduro, ta bisa cu esaki no cuadra. Cu tin un mocion a wordo entrega, pero cu en realidad e no tin validez. Pa loke ta e mocion mes, esaki lo wordo discuti den un otro reunion ya cu e encuentro di diamars merdia a wordo yama cu otro puntonan di agenda.
E reunion no por a cuminsa na tempo, pasobra inicialmente no tabatin suficiente miembro presente. SPA ta conta cu mas o menos 400 miembro.
Maduro a splica cu e reunion a wordo yama pa trata diferente punto cu nan a papia cu Minister riba dje, entre otro e materialnan cu miembronan di KPA mester di dje, e protocol cu a papia cu e Minister anterior caba, siguridad di e Polisnan, wardanan cu mester atencion, bond di cuminda, opleiding, e situacion na Barcadera, unda cu mester di mas Polis pa traha eynan y diferente otro preocupacion mas.
Pero na momento di e reunion a constata cu tabatin hopi miembro, compara cu otro reunionnan, pero no e gran mayoria. Remarcabel ta cu e grupo grandi cu a duna acto di presencia tabata e grupo di Polisnan di Justitiele Dienst, ta kendenan tambe durante e reunion a expresa malcontento pa cierto situacion y a entrega un mocion di desconfiansa pa e baha e Presidente y su directiva. Maduro puntra riba e mocion desconfiansa, a nenga esaki. El a splica cu berdad a bini cu un mocion di desconfiansa y cu mayoria di e miembronan presente a sostene e mocion di desconfiansa. Pero esaki no ta valido.
E tabata un reunion hopi agita, ya cu e mayoria a bini decisivo pa core cu e directiva. El a bisa cu nan a acepta cu e mocion ta wordo entrega. Riba e tema aki e directiva lo yama un reunion cu esnan cu a presenta esaki pa mira ta cual ta nan deseonan. “Si nan kier un eleccion nobo, no tin problema. Nos lo yama un reunion nobo.” Mayoria di esnan presente den e reunion, el a bisa, tabata Recherche y no esnan di straatdienst. El a sigui bisa cu e no tin problema pa yama un reunion pa un eleccion nobo “pasobra nos no a haci nada for di sla”.
El a splica cu no por a atende cu e mocion, pasobra esaki no tabata poni como punto di agenda. Ademas, Statuut di KPA ta bisa cu pa por baha un directiva (presidente) mester tin 25% di voto di e miembronan di SPA, no di esnan presente den e reunion. “Pesey mi a bisa esun di e mocion pa tuma e Statuut y repas’e. Loke el a bin cun’e e no ta concreto y e mester wordo sosteni cu prueba. Nos ta hopi transparente y nos a acept’e toch,” e Presidente a expresa.
