Dia 24 di Januari, 2018, lo bay tin un conferencia na Cas di Cultura, pa 7’or y mey di anochi. E conferencia aki ta titula “Prevencion ta miho cu Detencion”. Segun Marcel Balootje y presidente di Mount Horeb Ministries Fortaleza pa Famia, e ta bin deriva di un buki cual el a skirbi ‘Kico tin tras di tralie’, cual ta un buki cu ta preveni criminalidad bao di hubentud y den famia.
A forma un panel cu ta bay papia di nan experiencia, pero tambe locual nan a lesa for di e buki, pa por duna mas enfoke, pa duna miho splicacion tocante prevencion di criminalidad bao di hubentud. Diaranson awo, lo ta un dia grandi pa Aruba, pa tur esnan cu por bishita e conferencia.
E panel
Enid de Kort ta un terapista di famia y pareha, na departamento di asuntonan social. Riba e anochi aki lo bay coy un angulo un tiki familiar. E ta bay saca pasashinan di e buki di mr. Balootje y lo bay mas profundo den nan. Por ehempel e ta bay papia un tiki mas cu hopi biaha mayornan mester por ta miho mayor. Mester educa nan yiu bon. De Kort ta bay un tiki mas cu si mayornan a yega di analisa nan mes, con nan ta para como mayor. Con nan mes a wordo educa. Hopi biaha nos ta educa na e manera con nos a wordo educa. Kico ta e exitonan cu nan tin den nan educacion nan mes y kico ta e cosnan cu nan lo no kier pasa pa nan yiunan. Si bo ta un mayor emocionalmente stabilisa, bo por tin hopi mas energia pa cuida bo yiunan.
Hopi biaha nos ta papia di e palabra respet. Awendia Aruba tin mas cu 100 cultura. De Kort a traha cu hopi cultura na Aruba y cada cultura ta defini otro, e parti kico kiermen respet. Ora cu nos ta bay papia di por ehempel respet na hende, tin cu bay profundisa den esaki. Esey ta un anochi cu de Kort kier a tira full un otro angulo. Trahando cu mayor y famia, cu si mayornan mes no ta sinti nan bon, ta hopi dificil pa educa muchanan den un bon direccion.
Eric Barry ta onderinspectuer division sectie bijzondere verordening. El a traha 16 aña como recherche. Mayoria caso cu hubentud. Tambe e ta instructor di Taekwondo y tin su propio scol pa 32 aña. Tema lo ta mas tanto den hubentud. Con un persona ta yega bira criminal na un edad hoben. Amigonan, influencia, etc. Tambe mayornan, ta hunga un rol. Falta di mayor, atencion, etc. Como mayor bo mester tey semper cu bo yiunan, pa guia nan, pa nan bay den bon caminda. E tema ta mas tanto cu hubentud, con nan mester ta cu respet pa hende y bay na e manera di mas corecto cu ta posibel riba caya, pasobra tur hende kier mustra cu nan ta tough of nan no ta respeta ningun hende y esey no ta e caso. Ta djis atencion nan mester y amor. Esey nan tin mester. Den ramo di deporte, Barry ta mira esey hopi. Mayoria di nan, e ta manera un tata pa nan, pa guia nan.
E motibo
Segun Marcel Balootje loke a pone organisa e actividad aki ta, tur locual cu ta sosodiendo actualmente rond di nos. E tin basta tempo caba ta wak e situacion y ta ripara cu e situacion no ta facil. Tin hopi problemanan social cu no ta draai rond di finansas, pero nan ta draai rond di amor, rond di rechaso. Ta uza e palabra rechaso, ta un topico cu el a pone den e buki, pasobr rechaso di yiu ta haci su curason duro. Ora un mucha wordo rechasa na chikito, su curason ta bira duro, cu e no tin curason pa otro. Esey ta pone cu e ta bira hopi facil pa bringa, hopi facil pa haci algo robes pasobra e no ta sinti. Ora un mucha no ta sinti, ta un peliger hopi grandi. Esey ta un parti cu tin hopi mucha den comunidad cu a mira nan mayornan bringa. Nan a wordo maltrata, nan a mira nan mama wordo maltrata, nan a mira nan tata wordo maltrata y esey a cambia nan pensamento totalmente. Por ta e ta zona manera un chiste, pero duresa di curason, duelo, no ta cura cu paracetamol. Ta algo hopi fuerte. E ta algo cu bo tin cu trata cun’e na chikito, pasobra mas grandi e bira, mas duro e curason bira y bo ta haya un mucha ta haci un cos y despues ta puntr’e kico el a haci, e no por contesta. Na un momento el a bay off, el a haci algo cu no ta bon. Esey ta un di e parti di e topico mas principal pa diaranson anochi, dia 24 di Januari, den e conferencia. Balootje kier hala atencion di mayornan, pa cuida nos mes con nos ta papia cu nos yiunan y kico nos ta haci dilanti di nos yiunan. Hopi biaha nos ta haci cosnan, cu pa e yiu ta keda como un pelicula pa semper den su mente. Pa nos, nos ta lubida. Por ta, ta haci un cos na cas, bo ta sali bay dal dos drinks pafo bin bek, pabo el a caba. Pero pa e mucha, e ta un herida. Esey ta e topico cu a pone Balootje skirbi.
E titulo di e buki ta dia cu e tabata den sluis na KIA y a mira un mucha sali. Nan a bin cu un mucha cu su man y pia na boei. Ora cu a mira e mucha y mira su edad, el a haya e titulo di e buki “Kico tin tras di tralie”. Kico ta pone un mucha pensa cu bin den prizon ta haci’e homber. Cu e tin e experiencia ey. Un parti di e experiencia ey, ta hay’e den duresa di curason.
Entrada
Entrada ta na balor di 20 florin. Bo por hay’e na Citgo Boulevard, Citgo Essoville y Birckenstock Boulevard. Tin un plan pa e mayornan. Sa cu tin hopi mayor cu a pasa den situacion, dificultad cu nan yiunan. Pa nan y pa henter pueblo di Aruba, ta ofreciendo si e mayor ta bin cu e yiu, e carchi ta costa 15 florin. Mayor cu yiu ta drenta cu un carchi. En bes di e prijs subi, e prijs ta baha. Pasobra e necesidad di yuda e muchanan cu ta pasando den problema ta grandi. E no ta chikito. E no ta cura cu un calypso. E ta cura cu un tempo di amor, un tempo cu bo tin cu bolbe build up amistad entre mayor y yiu. Pesey ta ofrece e carchi.
Ora un mucha mes tende y mira, e ora e sa kico e cos ta. Mayor y yiu, e carchi ta costa 15 florin y e carchi ta obtenibel desde mañan mainta for di 10’or di mainta y diaranson tambe.
Tin hopi chens pa trece cambio. Na final lo tin un sesion specialmente pa mayornan cu nan yiu cu a pasa den trauma. Pasobra tin cu rescata nan. E unico manera pa rescata nan ta pa duna nan un man. E mucha mester un man den tur sentido den su bida. E tin mester wordo aprecia. Un mucha cu a pasa den tipo di situacionnan, e ta crece manera su wesonan ta kibra. E ta perde animo di bida. E kier biba slons, pasobra e kier bisa cu ya su mayornan a trat’e asina, e no ta wordo aprecia. Bo ta trece un situacion den su bida cu e ta manera down. Kier dun’e un push. Kier yud’e. Ta cera e programa cu un oracion. Ta mustra cu e muchanan aki tin balor y nan por lanta ariba. Di berdad nan ta hopi. Nan ta miles riba e isla aki. No ta tur mucha ta bay polis, bay bisa cu a mira papa dal mama un wanta of a mira mam pasa papa un mep. Nan ta mira cosnan y nan tin cu keda keto. Y ta hopi tin. Pa no haya nos den situacionnan mas fastioso cu nos ta caba, ta bon pa duna nan un man y lanta. E conferencia aki ta na su luga, caminda cu ta join hunto, pasobra tur tin cu pone e nanishi den e mesun direccion pa trece solucion den e problemanan social cu nos tin.
Maltrato ta tuma luga den tur clase. No tin maltrato di cas pober, ni di cas rico. Maltrato ta tur caminda ta hay’e.
