Desconocidonan a drenta den trailer di Bureau Trai’ Merdia y a bay cu varios cos. E trailer ta riba tereno di Colegio San Hose. Trahadonan di Trai’ Merdia ta masha mal contento cu e situacion. Mainta tempran nan a bin y haya e luga na werki.
Cabesante di e scol a tuma contacto cu nan pa asina bin mira kico a pasa. A haya tur cos reboltea. No tabata tin mag di mishi cu nada, ya cu polis mester a bin haci nan investigacion y tuma fingerprint. Despues cu nan a caba, e docentenan por a drenta y coy inventario di loke a bay cun’e.
E trailer ta parti entre e scol y e bureau. For di e parti di scol, antisocialnan a bay cu un airco, un airco entre otro. Pa loke ta e parti di Bureau Trai’ Merdia, despues cu nan a caba, mester a drecha e luga pa asina sigui cu nan trabao di tur dia.
Nan tabata tin un freezer chikito, nan a bay cun’e. Nan a los e waya di e otro freezer, pero no a logra bay cun’e. A bay cu dos microwave. Tambe nan a bay cu cinco radio cu nan ta uza den klas, dos percolator, dos dinnerset. Nan a bay cu wega di mesa manera ganzenbord, mens erger je niet, wega di domino. Nan speaker grandi tambe nan a horta. Blender cu nan ta uza pa traha frio pa e muchanan. A bay cu tur e materialnan di frio, koolaid.
Estorbo
Nan ta hayando sosten cu e microwave, pero asina mes e ta stroba, pasobra e muchanan ta bin pa keinta nan cuminda tur merdia. Awor aki tin cu saca un comunicado pasobra e luga no ta safe. A haya un microwave fia, pero tin cu bay cun’e cas. Tur otro material nan a perde. Awo tin cu warda wak kico nan ta haya di oficina bek. Ta materialnan relativamente nobo. Ta bira asina dificil pa duna e mayornan e facilidad pa keinta cuminda.
Con nan a drenta
E ladronnan a forsa un porta. Nan a corta e cadena di e candal. Despues a forsa un porta, djey skop’e. Na un otro porta tambe nan a forsa.
Por a ripara tambe cu nan a cuminsa corta tierap pa un siguiente biaha, pero no a continua. Te asina leu, nan no tin idea ki ora esaki a sosode. Ta ora e cabesante a yega mainta, nan a ripara kico a pasa.
No tin alarma ni siguridad
Actualmente pa awe a busca un security, a pone toch pa perde e resto di cosnan cu nan tin den e trailer. Ta jammer cu ta traha asina duro y ta bay cu e cosnan. No por haci e actividadnan manera mester ta.
Con comunidad por yuda
E trahadonan di Trai’i Merdia ta haci un trabao honorabel, pa wak pa mucha mientras cu mayornan ta traha. Loke nan ta pidi pa esnan cu wordo acerca cu materialnan pa cumpra, freezer, microwave, set di servies, speaker, cu bo ta mira cu e cosnan no ta normal cu hende ta bende. Puntra of mira si e por ta di Trai’ Merdia.
Un dia abnormal
Lider di Centro Trai’ Merdia di Santa Cruz, a comenta cu ta varios biaha nan ta horta nan. Nan mester a draai cu loke nan tabata tin. Tiki tiki a logra draai. A splica e muchanan kico a pasa, pasobra e ta stroba full e proceso di merdia. No tabata tin microwave pa keinta nan cuminda. No por a hunga cu tur cos manera custumbra. Tur hende ta un tiki tristo. A pidi e mayornan cooperacion mientras cu ta haya un solucion. E luga no ta sigura. No tin un sistema di siguridad cu por bolbe tur cos y pone, sin conta cu no tin e fondonan mas. Tur cos a bay.
E dia di mañan nan lo tey pa nan muchanan. Y lo bolbe evalua con pa haci pa sigui draai na e miho manera, cu cooperacion di lidernan di centro y tambe e mayornan.
Full e team tey, e lider a comenta. Tin biaha ta dushi pa cumpra algo na un bon prijs, pero pensa di unda el a bin. El a bin di e mucha nan mes, di e trabao duro di e centro, caminda nan ta draai tur dia ta bende un frio, bende chips, pidi mayornan cooperacion, tiki tiki haci actividad pa cumpra material, y e ta wordo horta y bo ta cumpr’e segunda mano, pero cu a hort’e. Asina ey bo tambe ta participa hunto cu e hortamento. Sea conciente cu si nan acercabo pa algo, yama polis.
