Parlamentario Alan Howell a indica den reunion publico di Parlamento pa atende e ley di crisisheffing cu “awe ta un dia hopi tristo, ta tratando algo serio cu ta bay haci pueblo dolor.
Nos ta akiden pasobra tin un gobierno nobo cu a tuma e reto pa goberna e pais aki na un manera drechi. Nan a topa un deficit di 275 miyon Florin cu mester a atende na corto tempo”. Pa colmo, tabatin un promesa di e gobierno anterior cu lo mester tabatin un surplus di 25 miyon Florin.
Gobierno a traha un plan y a baha e defict te na 191 miyon Florin, esaki no tabata suficiente pa Hulanda y CAFT. A traha riba diferente adaptacionnan y a logra bahe te na 149 miyon Florin.
Parlamentario di POR ta expresa cu ningun gobierno lo kier castiga su pueblo por nada, pero pueblo ta bon conciente cu no tin scapatoria pa e crisisheffing. Esaki no ta solamente pa sanea nos finansas publico, pero tambe pa nos pais por sigui draai y e gobierno aki a mustra e plannan cu tin pa haci esaki.
Igualmente Howell a manda un mensahe na e comerciantenan cu kier abusa di e situacion, pa nan watch out, pasobra Parlamento lo ta pendiente. El a pidi Minister pa por tin un bon bista riba e comerciantenan pa evita cu nan haci e abuso aki contra nos pueblo.
Finalisando el a bisa cu e ta un situacion fastioso, pero no tin un otro manera. Esaki ta e realidad y ta desea pa oposicion ta sincero, pa no haci politica y pa tur hende na Aruba compronde e sistema di crisisheffing. Nos tur ta stima nos pais, nos tur kier Aruba bon y esaki ta na bienestar di nos pais completo. Alan Howell ta spera cu tur hende vota pro na bienestar di Aruba pasobra nos tur mester sali na vanguardia di nos pais.
