E situacion di cachonan di caya, cada biaha ta bira mas preocupante pa varios di e fundacionnan cu ta boga pa e bienestar di e animalnan.Yesenia Farro-Arends ta un voluntario cu tin por lo menos 20 aña ta luchando cu e problematica aki. Fuera di esey el a traha 15 aña na dos veterinario y te ainda e ta bezig, hunto cu tur e fundacionnan pa por yega na un Aruba cu menos bestia riba caya.
E situacion na Kapel di Alto Vista no ta diferente cu otro caminda. Tin cierto caminda y hopi bario tin cacho ta yega y pega den e bario. Bisiñanan ta cera cabes, ta opera nan, vacuna nan y duna nan loke nan mester. E cacho ta keda cuida e bario y tur hende hunto, ta keda cria nan.Na Alto Vista e situacion no ta diferente.
Hende ta tira e cachonan ey constantemente y e fundacionnan ta man yen pa busca un hogar pa nan, etc., cual nan no ta desea di haci tur ora. Semper tin un cacho cu ta pega, Farro-Arends a splica. Den e caso aki un cacho di colo bruin a pega y a zorg pa oper’e, a laga vacun’e, implanta un microchip y dun’e tur loke e tin mester. E ta un cacho hopi trankil y rustig cu tur hende. Hendenan ta custuma cu ne.
Despues di un tempo a benta mas cacho eynan di cual un di nan a pega y a dicidi cu ta lag’e eynan como compañe di e otro. A resulta cu recientemente un persona a bin cana cu su cachonan, laga nan los, cual ta contra ley. A drenta den cura, ataca e cacho y e cacho a keda cu dolor. Consecuentemente a morde varios hende despues.E problema tabata cu e persona cu ta encarga cu Alto Vista, a tuma contacto cu Farro-Arends, mirando cu entre nan, ta percura pa e cachonan, splicando e situacion.
A morde turistaAlgun turista a bin Alto Vista y a tuma nota di e cacho. Obviamente nan kier a caricia e cacho. Apesar cu a avisa pa no mishi cu ne, mirando e problema cu e cacho tin, nan no a scucha. Consecuentemente e cacho a morde un di nan y a yama polis. Polis a bin, cual ta comprendibel.
Unico cos cu nan por haci ta coy e cacho bay cu ne, den bista di e turistanan. E ora e cacho ta bay na e Centro di Control di Aruba, caminda inhustamente tin cu pone drumi pa e un biaha cu el a morde un hende, cu no ta su fout. Pasobra un cacho, ta morde hende ora e tin dolor.
No ta hustoTin asina hopi fundacion, tin asina hopi forma cu por busca un di dos oportunidad pa un cacho en bes di bay tir’e den un mondi of unda cu ta rond, pasobra cu no kier hib’e na e killcage. Hopi hende ta consciente di kico ta pasa den e killcage y ta prefera mil biaha pa no pone nam cacho drumi.
E ora ey no ta husto pa bay bandona e animal na Andicuri, na Wariruri, p’ariba na e grotnan of unda cu ta na Aruba. E pober cacho ta sufri mascu e mester sufri cinco minuut den e killcage.Tin asina hopi fundacion cu ta dispuesto pa yuda un hende cu su cacho cu mester haya un otro cas, haya esaki.
Sa cu e fundacionnan ta man yen. Pero no tin necesidad pa tira e cacho un caminda. Awendia tin Facebook, un rato ta pone eyriba y ta haya un cas pa e animal. Por ta no ta e miho cas, pero e no ta bay caba den un Andicuri of Wariruri, bandona pa tres dia sin come of sin bestia, pasobra esey ta inhusto pa e bestianan tambe.
Ta comprendibel cu e situacion di COVID a hinca hopi hende den e circunstancia ey cu nan tin hopi berguensa pa deshaci di nan cacho pasobra no por otro. Tin otro manera pa haci esaki. E no mester ta haci door di bandona e bestia un caminda.
