Durante un conferencia di prensa, candidato pa partido AVP Wendrick Cicilia a señala cu Minister di economia actual ta ricibiendo credito pa tur loke e ta haciendo riba renobacion di monumentonan, caya grandi y cierto proyectonan. Sinembargo, tur esey ta basa riba estudionan cu partido AVP y cu fundacionnan a ehecuta. “Esakinan no ta plannan cu a bin for di e minister actual, pero ta plannan cu partido AVP a laga cla pa comunidad di Aruba” segun e politico hoben.
E candidato a sigui indica cu partido AVP a laga varios proyecto cla entre otro: E proyecto di Linear Park unda cu personanan por recrea, haci deporte, facilidad di fluho di trafico, por aprecia facilidadnan cu e partido a laga atras durante su periodo di gobernacion.
Cicilia a indica cu na e momento aki e gobierno actual keto bay ta haciendo estudio, e politico a señala den un tono chistoso: “Cu nan ta bay cas y nan ta bay sigui haci estudio tambe, cada bes cu bo puntra Minister di economia, Minister di naturalesa, diferente Minister….cada minister tin cu haci estudio…mi ta bisa bo….”
E politico a mustra cu no tin momento pa haci estudio den gobernacion, na momento cu ta bin pa goberna… bo ta bin pa goberna, pasobra bo plan ta cla y debidamente prepara, a mustra cu e partido politico tin su plannan bon defini.
E politico di partido AVP a mustra riba e proyectonan di e partido, entre otro: riba tereno di economia: a diversifica di nos economia uzando energia alternativa, a bin cu institutonan di Hulanda manera TNO pa yuda duna contenido na e vision aki.
Encuanto energia Cicilia a señala cu tarifanan di energia y awa a bira impagabel pa nos comunidad, pesar cu Gobierno a priminti cu lo bay baha e prijsnan di utilidad na comunidad. E gabinete actual ta ranca dividendo for di e companianan di utilidad cu na su turno ta percura pa e prijsnan di utilidad no por baha, esaki ta un maneho contra comunidad di Aruba.
Den pasado tawata tin diferente estudio haci con lo bay regula prijsnan di energia y e forma cu lo atende cu e transicion energetico di nos pais. E parlamentario a enfatisa cu Aruba ta un pais bendiciona cu ta conta cu facilidad di awa, solo y biento y tin cu uza e recursonan natural tambe cu por genera energia.
Tin plannan skirbi con lo desaroya e espacio publico di nos isla, con ta bay renoba nos caya grandi, nos scolnan, nos infrastructura, tur cu e meta pa por restaura e aspectonan di nos isla pa tin un calidad sumamente eleva.
Segun e politico: “Nos tur lo kier wak un Aruba desaroya, un Aruba prospero”. E realidad actual cu por wak aspectonan di un pais neglisha cu ta refleha su mes den tur e aspectonan fisico di Aruba, den tur skina di nos barionan, por wak cu desperdicio a acumula rond di nos isla pa mal maneho y incapacidad di gobernantenan.
Cicilia a señala cu ta momento pa por tin atrobe den gobernacion personanan cu tin amor pa comunidad di Aruba, cu tin liderazgo, curashi y cu determinacion pa gobernacion sosode a base di preparacion.
A referi cu por wak varios documento produci por ehempel riba un vision pa San Nicolas , pa caya grandi, esaki a resulta den diferente proyectonan cu ta na beneficio di comunidad di Aruba.
Un aspecto preocupante den nos sociedad ta cu nos ciudadanonan tin cu traha 2 te hasta 3 trabao pa sobrevivi, e candidato a señala cu AVP ta un partido cu ta para pa calidad y miho condicion di bida pa nos hendenan. A agrega “cu no ta saludabel cu gobierno ta pretende di celebra cu tin surplus y ‘ratings’ positivo, mientras cu comunidad ta biba den preocupacion financiero diariamente.”
