Durante e segundo edicion di ‘Foro Nacional pa Adulto Mayor’ dia 26 di maart 2024, a organisa varios sesion interactivo. Alrededor di 150 participante a bini hunto pa intercambia idea y conocemento riba esfuerso actual pa atende cu e reto- y oportunidadnan di envehecimento.
E Foro Nacional pa Adulto Mayor ta un evento organisa door di Minister Ursell Arends hunto cu Directie Ouderenzaken pa explora e solucionnan sostenibel y mantene e lasonan bou di e gruponan di interes di adulto mayor.
E evento a inicia cu presentacionnan duna door di stuurgroep y werkgroepen y e orador internacional Ab Klink, ex-minister di Salubridad, Bienestar y Deporte di Hulanda. Diferente recomendacion y sugerencianan a wordo treci dilanti riba temanan di, entre otro, cuido na cas, financiamento di cuido y envehecimento activo. Despues di esaki, esunnan presente a participa na sesion interactivo riba e temanan menciona pa sigui añadi ariba e plannan y pa honra e compromiso cu nos adultonan mayor.
Den e sesionnan interactivo a profundisa den e discusionnan riba e reto y oportunidadnan. E dialogo aki a demostra e deseo sincero di e comunidad pa colabora cu otro y atende cu e necesidadnan di e adultonan mayor.
E temanan relevante manera bienestar fisico y nutricion tabata discuti, subrayando e importancia di conscientisacion y acceso na un dieta saludabel y pagabel. Ademas, con pa fortalece e conexionnan familiar y promove un estilo di bida mas activo y saludabel como esfuerso preventivo di malesa cronico pa adulto mayor como tambe pa esunnan no 60+.
Un otro tema discuti ta e sosten pa dunado di cuido informal, esta mantelzorgers, varios di cual ta un yiu of ruman cu ta cuida un miembro di nan famia na cas. E iniciativanan educativo y clarificacion di e opcionnan di sosten disponibel tabata puntonan treci dilanti. Financiamento di cuido tabata un otro topico discuti intensivamente, mirando e lista di espera na e casnan di cuido pero tambe costo di cuido na cas.
E contribucionnan di e sesionnan interactivo lo ta poni den un rapport y publica dia 18 di april 2024 riba publico.aw. E resultadonan clave lo forma e base pa e futuro desaroyo di maneho, garantisando cu cada adulto mayor na Aruba por gosa di un bida digno. E segundo edicion di Foro Nacional pa Adulto Mayor a reafirma e compromiso di Aruba pa crea un ambiente unda e adultonan mayor no solamente ta sobrevivi, pero ta florece y ta participa activamente den e bienestar di nan mes y di e comunidad. Minister Ursell Arends ta gradici tur cu e aporta na e discusionnan interactivo cu nan tempo, conocemento y vision pa futuro.
