Tabata dia 10 di september 2023 unda cu CEDE Aruba a organisa su evento di Ban Caya 2023 y na mesun momento inaugura nan proyecto piloto WAW (Wega Ariba Wiel) Mobil. E meta di e WAW Mobil ta pa pasa den tur bario na Aruba y tene actividad deportivo cu e muchanan. Un proyecto cu a keda realisa bao direccion y cooperacion di Bario Unico hunto cu FCCA y IBiSA, y tambe e Polisnan di bario.
Coordinado di proyecto y evento na CEDE Aruba, Elsa Krosendijk, den e caso aki tambe encarga cu e proyecto WAW Mobil, a splica cu nan a pasa den diferente bario di Aruba pa haci un sondeo riba kico ta e necesidadnan cu nos muchanan tin. “A base di esey a cuminsa e programa aki na unda cu cuater luna largo tabata tin diferente bario cu muchanan cu a participa.” Den cuater luna, mas o menos 300 mucha a participa den su totalidad den diferente districto rond di nos isla, haciendo deporte.
E muchanan ta siña tambe cu no ta solamente telefon of laptop tin, pero tin oportunidad tambe pa topa cu otro muchanan di nan mesun bario. E WAW Mobil ta ekipa cu instructornan di IBiSA cu ta brinda varios actividad di movecion n’e muchanan. E luna aki a caba di ricibi un cargacion grandi di diferente materialnan nobo for di Hulanda na unda cu pa e proximo simannan cu ta bin lo ta hinca den e WAW Mobil.
“Esaki lo yuda muchanan sigui desaroya nan conocemento den diferente deporte. No solamente e muchanan chikito, nos ta papia aki di muchanan di tres cuater aña, pero tambe muchanan mas grandi”, segun Krosendijk.
Movecion ta importante
Tin diferente actividad di movecion cu ta totalmente gratis. E lider di programa di Centro di Bario Dakota, Jennifer Gamez ta conta nos cu paden di edificio tanten cu e WAW Mobil ta para pafo por ehempel, nan ta duna les di Chess cu ta tur diasabra. E orario ta 12:30 pm pa 1:30 pm y nan ta bay te cu 4:00 pm.
Bo por pasa dialuna comienso di siman anto inscribi, totalmente gratis. Tambe tin PopCorn Dancers unda e muchanan por bin siña tocante coreografia, tin instructor di Zumba tambe. “E ta djis pa bo bin y laga bo yiu participa, y move, pasobra movecion ta algo hopi importante pa abo como mayor tambe move.”
Talento di bario
Gregory Milliard di Milliard MMA Academy Aruba tambe tabata presente den Dakota, e bario cu el a nace y lanta, hunto cu e team di Dakota pa crea un proyecto p’e muchanan di e bario. “Ami a nace akinan mi a lanta ta hunga bala cu diferente di e guynan, awe mi por bisa mi por eherce un proyecto cu mi tabata tin den mente pa hopi aña cu yama Talento di Bario.” Akinan e meta ta pa bay na tur e barionan di Aruba anto el a keda presenta na diferente instancia caba.
Awor a cuminsa implementa esaki den bario anto lo consisti di diferente tipo di deporte, sigur den e parti di Martial Arts. Entre 11 cu 17 aña caba ta muchanan cu lo por cuminsa traha cu nan. Tur Dialuna lo tin un grupo di Milliard Academy na Centro di Bario Dakota pa traha hunto cu e hobennan pa stimula y motivanan den e parti di deporte, nutricion, disciplina y movecion.
Aña pasa CEDE Aruba a acerca IBiSA pa forma parti di e team cu ta ehecuta e programa di WAW Mobil. IBiSA ta haci esaki mediante su instructornan di deporte. E intencion ta pa e biaha aki bay cuater diferente bario, manera Centro di Bario Dakota, na San Nicolas lo bay Village, Bushiri, na tur e proyectonan di FCCA.
E instructornan di IBiSA lo duna e muchanan e oportunidad pa conoce diferente deporte, cu actividad fisico den un manera sano y educativo lo duna e muchanan oportunidad di haci movecion durante un ora y mey cada biaha. “Pa nos e ta un honor y placer pa bolbe contribui n’e proyecto aki cu lo dura practicamente henter e aña. E muchanan cu participa ta haya un Participation Card, y cada biaha bo bishita e actividad bo lo haya un marca. Ora completa esaki nan tin oportunidad di gana premio”, segun Jessy Beukenboom di IBiSA.
Di parti di FCCA, Rachell Murray ta aplaudi e bunita iniciativa aki di CEDE Aruba y IBiSA caminda e habitantenan ta haya e placer pa uni den nan bario mes. “Esaki ta un bunita participacion caminda e bario ta yega hunto. Muchanan di diferente edad por hunga y desaroya nan mes den un forma placentero, sigur, den nan bario. No mucho leu di cas, cual pa FCCA esaki ta algo hopi grandi,” segun Murray. E ta generalmente hopi bon unda mayornan por sinti nan mes safe cu e muchanan ta den bon man di profesionalnan cu sa di educa nan yiu den un forma positivo.
