Den menos di 24 ora cu e Wacamaya Dior a bula bay for di su cas na Weg Fontein e ta bek cerca su doñonan. El a bay cu henter un operacion unda hasta Bomberonan tabata envolvi. Pero finalmente diaranson mainta despues di 7’or Dior tabata bek cerca su doño.
Dior ta un Wacamaya cu a perde den vecindario di Weg Fontein diamars den careda di 6’or y mey di atardi. Su famianan tabata hopi tristo y a pidi yudansa di e pueblo di San Nicolas y di Aruba pa yuda trece Dior bek cas.
E noticia aki a bay mesora riba 24ora.com y asina yamadanan a cuminsa drenta cerca e famia. Habitantenan di Pastoor Hendrickstraat a notifica famia di Dior cu nan a mir’e den e mata di coco full a riba. A haci un apelacion na Cuerpo di bombero cu a yega den un tempo record pero no por a haci mucho pasobra no tabatin e ekipo adecua pa por a yega na e punto mas na halto.
Despues a dicidi saca un otro unidad di Bombero for di nan base principal na Tanki Flip pa asina por a rescate. Den e proceso mester a corta un cadena di cura di un misa pa asina e truck di Brandweer por a yega mas cerca posibel di e mata di coco. Lamentablemente durante cu tabata bezig ta rescata Dior, el a slip for di den e mata y a bolbe perde for di bista. A start un buskeda den e area na pia y den auto pero sin resultado.
E doño Juan David a splica cu nan tin Dior apenas seis luna. Su tata a sake pa dun’e su cuido y el a bula bay.
A logra hay’e
E buskeda a sigui diaranson trempan. Algun miembro di famia a bay busca den bisindario pa mira si ta topa cu Dior, ya cu nan tin e presentimento cu e no por a bay mucho leu. Pero tabata scur y dificil pa mir’e.
E sorpresa a drenta rond di 7’or di mainta. Un familiar a informa e doño cu nan a mira wacamaya Dior riba un mata basta halto net banda di e T-kruising di Scol di Arte. Juan David a bay y a trata di gar’e, pero atrobe el a bula move for di e sitio y a cay den un mondi cerca. Asina a logra hay’e bek finalmente, esta den e mondi.
“Famia ta aprecia y ta hopi gradicido na un y tur, conoci y famia, cu a sali yuda busca Dior. Na final nos ta manda palabra di gradicimento na e team di Brandweer pa nan tremendo trabao, y nos no por laga e team di 24ora afo cu a sa di activa y informa e comunidad di biaha.”
Pa esnan cu kier sigui travesuranan di Dior, e tin un account riba Instagram: Diorthemacaw