Algun empleado di Hyatt Aruba Regency hunto cu otro voluntarionan a uni forsa pa duna un man na sra. Clara Kock, kende ta biba den Watapana Gezaag, y a hay’e den un situacion penoso diabierna den oranan di merdia. E biento fuerte cu a azota Aruba a ranca e zink di su dak.
Pone e zink bek no ta algo cu por sosode di un momento pa otro, pa motibo cu lo mester di material.
E iniciativa a bini di sra. Shaydee Schwengle, kende ta Sales Manager na Hyatt, kende lesando noticia riba 24ora.com a bin topa cu e noticia di e señora di Watapana Gezaag. “Ora cu mi a wak esey, mesora mi a pensa lagami wak ken mas por yuda pa nos haci algo; duna un aporte (placa of material),” el a conta. Mesora el a drenta den contacto cu redaccion di 24ora.com y asina e situacion a cuminsa lora.
Asina a logra manda un colega na e sitio cu a graba e situacion na e cas pa mira kico mester wordo haci. E momento ey algun voluntario a pone un lona di emergencia. A constata cu ora e zink a bula, e awa a zak e blafon a bin abou. Mester a saca tur pertenencia di e señora, kende no por a pasa anochi eynan.
Schwengle a tuma contacto cu algun colega pa haya e hendenan necesario pa haci e trabou, pero tabata falta e material. Su tata, kende ta traha na Kooyman, a mustra gerencia e situacion y nan a dicidi di coopera cu mayoria di e materialnan necesario. A haya ayudo di Zenla, cu a pone personal pa baha e dak.
Trahadonan di Hyatt ta un team cu normalmente ta haci varios proyecto pa comunidad en general, pero cu no ta haci propaganda pa esaki. Normalmente no ta traha riba casonan individual tampoco.
Yllerson Contreras, propietario di Zenla Construction & Engineering, tambe tabata na e sitio. El a provee algun trahado di construccion pa e trabou por keda realisa mas lihe posibel na cas di señora Clara Kock. E tambe a mira e noticia riba 24ora.com y asina nan a uni na e team di empleadonan di Hyatt, pa pone e dak mas lihe posibel. Hasta un pida cu no ta bon, a dicidi di kit’e y pone di nobo pa sigura cu e situacion ta keda bon na e cas.
Clara Kock tabata hopi emociona, kende no por a kere cu den menos cu 24 ora e situacion di su cas a keda soluciona. Un susto el a pasa aden na momento cu e biento fuerte a ranca e zink y a lague den shock ainda. E anochi anterior (diabierna), el a keda cerca un ruman y cu awa na wowo el a gradici tur esnan cu a coopera pa drecha e dak completo di su cas. “Mi ta hopi gradicido na tur hende, Dios bendiciona nan. Danki na Hyatt, na Zenla y na Kooyman y e hendenan cu a traha awe. Dios bendiciona nan tur,” e señora a bisa. Departamento di DOW a keda di manda personal pa haci un evaluacion y con pa drecha e situacion, pero nunca nan a yega.
