Mario Gonsalves ta e prome Arubiano pa gana un HKU Award pa su pelicula na Hulanda

Mario Gonsalves, un hoben Arubiano residencia na Hulanda, a traha un pelicula cu cual el a gana un HKU Award. Mario ta e prome Arubiano pa gana e premio aki cu un film den nos idioma Papiamento. Algo sigur pa ta super orguyoso di dje. 

Gonsalvez ta conta nos cu aña pasa, banda di maart, e tabata graba su pelicula “Patroon”, cual el a skirbi. E ta bay over di hobennan cu ta bin di Caribe cu ta biba na Hulanda y ta confronta nan mes cu nan propio identidad y stereotypering eynan.

E proceso di con Antianonan ta sinti na Hulanda y e ta uza e termino Antiano, mirando cu ainda nan ta reconoce nan eynan bou di e nomber ey. E ta un pelicula hopi personal cu ta bay riba tur emocion. 

Kico e pelicula ta haci

E pelicula ta mustra e lucha cu e hendenan di e region aki  tin na e publico Hulandes, pa asina tin un miho comprondemento tambe y hendenan por bin hunto y uni pa resolve e problemanan cu nos tin entre otro.

Crowdfunding

Pa por a yega na financiamento tabata un reto. Mario a splica cu esey tabata otro cos cu ora a dicidi pa traha e pelicula, a haci’e pa hendenan cu tin relevancia na dje so. Manera cu a haci esey tabata via e sistema di Crowdfunding. 

Nan no tabata sa mes cu esey lo a traha vooral riba e isla ABC. Pero sorpresivamente, totalmente, hunto cu Crowdfunding, etc. a yega na 22 mil 500 euro pa por a draai e pelicula aki, fuera di otro hendenan cu a agrega via nan propio credit card.

Experiencianan personal

Mario a lanta na Aruba den un famia cu no tabata tin mucho recurso. Su mama a lant’e y unda e ta awe, bo no por yeg’e facil si bo ta bin di un ambiente asina.

Mester pasa den masha hopi cos den bida. Tur e lucha y dolor eynan a yud’e den e proceso di skirbi e pelicula aki.

Un selfmade man

Mario Gonsalves tin un conseho pa hobennan. “Kere den bo mes.” Hopi biaha Mario mes a haya yen di no. Pero esey no kiermen cu esey no ta posibel. Hopi biaha hobennan manera e, mester di sosten, mester di hende pa motiva nan cu nan por. 

Aworaki ora cu bo wordo nomina, ta haya e tiki sosten eynan. Pero hopi biaha den bida ainda e sa haya no. E yabi ta pa kere den bo mes y djis no para. Tanten cu bo no stop, algo lo bin den bo caminda.

Nominacion

E nominacion tabata un sorpresa sigur pa Mario. Ta entre mas di 500 of 1000 studiante di henter e aña y bou di nan tin proyectonan super grandi, di otro studiantenan, cu a wordo reconoci rond di Hulanda.

Pero ganando e premio aki, ta nifica cu e proyecto tabata e miho den e parti artistico di henter e aña di HKU (Scol di Arte) den Utrecht, unda e ta studiando pa su Master.

P’e ta algo grandi, vooral cu a haci’e na Papiamento. E ta algo full nobo. E kier a traha algo cu ta cerca di su curason y pa wak unda el a yega awe, ta algo basta great, el a menciona.

Reaccion

Mario a haya hopi reaccion tanto di Aruba como for di Hulanda pa loke ta e premio cu el a gana. Tin varios fondo cu kier traha cu Mario riba otro peliculanan cu e tin. E reaccion ta basta bon, e ta menciona. Ta di spera awo cu por trece Aruba tambe prome cu e sali online. 

E kier haci un theatrical release na Aruba. Ta bezig cu esaki con por haci’e posibel. Awo cu e premio aki, awo si por logra esey.

Kico ta “next”

Awor aki Mario ta bezig cu su propio compania na Hulanda. “Recent”, di dje y di Valentino Angela. Ta traha produccionnan internacional, video di musica entre otro.

Pa fin di luna e tin uno pa haci di un artista internacional. Pa awo kier crece y inverti den talento local. Tin directornan di Corsou, Aruba entre otro. E kier echt pusha e parti creativo di nos islanan riba plataforma internacional.

Loke cu Mario kier mira pasa y di su mesun trabao, e lo traha cosnan relevante di su ambiente y for di unda e ta bin.