Venezuela a habri frontera cu Aruba atrobe

Vice Presidente di Area Economico di Republica Bolivariana de Venezuela, Tareck El Aissami, a informa cu entrante awe a habri e fronteranan entre  Venezuela y Aruba bek. E tabata cera algun dia prome cu a purba hiba “ayudo humanitario” di parti Merca, dia 23 di februari ultimo.

Presidente di Venezuela, Nicolas Maduro, a anuncia dia 21 di februari e ceramento di e frontera di su pais cu Brasil, despues di e declaracionnan di Jair Bolsonario, cu a afirma cu e forsanan Brasilero lo hiba yudansa humanitario pa Venezolanonan. A habri e frontera di tera cu Brasil, pero tambe aero y maritimo cu Aruba.

E mandatario Venezolano a duna di conoce durante un conferencia di prensa cu nan tin intencionnan serio pa traha di cerca cu Aruba riba asuntonan petrolero. Nan no a habri frontera ni cu Corsou y tampoco Boneiro pasobra ta considera cu e islanan a yuda Merca pa ta base pa ayudo humanitario, locual Venezuela obviamente no a aprecia.

Aruba Airlines a bisa nos di a tuma nota di e declaracion na television pero nan no a haya un notificacion oficial ainda, pa por reanunda vuelonan pa e diferente ciudadnan Venezolano unda tabata bulando regularmente.