Ta for di trempan caba autonan tabata drenta den Colony y casi por bisa cu nan ta “tuma e area over”. Habitantenan ta yama Polis cu ta baha nan for di caminda pa hohennan por sea pusta of haci fever riba caminda publico. Ora reclama, ta haya como contesta cu “nos ta paga belasting”. Ayera Polisnan a dicidi di pone un fin na e tendencia aki.
Unidadnan di Polis di San Nicolas patruyando a bin topa cu como 5 auto pustando y cu a pasa nan duro bay yegando Colony. E situacion tabata peligroso pasobra a manda e autonan riba e patruya, pa cual nan mester a baha caminda pa evita un accidente.
Testigonan a bisa cu tabata como 20 auto cu a drenta e area di Lago Colony. Cu ayudo di otro unidadnan di demas districto, a cera e unico entrada-salida pa Colony, na altura di e anker grandi y asina controla tur auto.
E accion aki a tuma luga despues di 2:00am den cual a controla tur auto saliendo, mientras cu a haci uzo di helicopter pa por a guia e unidadnan na unda e autonan a bay sconde y tabata mobilisando cu nan luznan paga. Algun otro a bay sconde na casnan no habita, comosifuera ta ey nan tabata bibando.
E control riguroso a produci como 5 detencion di chauffeurnan sin rijbewijs mientras cu a kita un cantidad di autonan cu no tabatin nan papelnan na ordo. Algun di e detenidonan a admiti cu nan tabata pustando. Ta considera e area sigur pa e tipo di caredanan asina pasobra “no tin hopi auto”. Polis a atende nan riba e peliger cu nan ta causa pa trafico y pa trankilidad den e area.
