Diabierna merdia gerente di Unocome Latin Food a pidi presencia di polis na su truck situa den De La Salle straat net dilanti Imelda kleuterschool pa raporta caso di vandalismo y ladroncia cu a tuma luga na su negoshi.
Den careda di 12:00PM e dama gerente a bay tira un bista y controla si tur cos ta bon cu su truck y mesora a tuma nota cu tabata tin bishita indesea na su luga.
A pidi presencia di polis pa asina e por informa cu el a bira victima di ladronicia y cu a purba drenta den deposito parti patras. E gerente a conta tambe cu nan a muda recientemente na e sito aki, cu nan a bin for di L.G.Smith Blvd. y for di e tempo ey pa awo el a bira victima di vandalismo y ladronicia dos biaha caba. Prome biaha e no a pone denuncia pero e biaha aki lo ta diferente.
Ta conta cu e ta haya straño cu aunke tin un TDQ na vigor, cu asina mes malechornan ta haya oportunidad di causa daño na negoshi y bay cu mercancia lagando comerciantenan disgusta y defrauda. Pa locual ta e robo, el a tuma nota cu falta tres boter di gas, tuberia como tambe mercancia for di su inventario. Pa locual ta e deposito, a purba pero no a logra drenta den esaki.
Polis a tuma tur datos y muy probable lo recuri na e bisiña pa asisti cu imagen di camara pa yuda gara e ladron of ladronnan cu a comete e acto aki. No obstante gastonan adicional, e gerente a informa cu nan lo ta habri pa publico y sirbi nan clientela awe nochi.
