Pa hopi tempo caba tin varios cabay blauw exponi den areanan strategico den centro di ciudad. Awe mainta sinembargo por lo menos un di nan, a lanta benta na suela dilanti un negoshi riba L.G. Smith Boulevard.
Un testigo a indica cu biento a bent’e abou. Pero un otro perdona no ta di acuerdo y ta sigura cu aki ta trata di un otro caso di vandalismo. Esaki ta debi cu a bin haya e cabay blauw benta riba caminda y no riba acera.
E cabay blauw a sufri daño na un di su pianan. No mas cu siman pasa a anuncia cu lo hiba e cabaynan den tayer pa drecha nan, debi cu durante aña nan sa sufri daño di hende cu ta subi riba nan, rasca nan, daño di solo y biento.
No a dura mucho cu e berdad a sali na cla: Un grupo di turista masculino ta esunnan culpabel di a comete vandalismo. Cuater homber a comete e acto aki unda nan a keda ranca na e cabay te kibr’e. E hombernan aki tabata hari con nan a comete daño na un propiedad cu no ta di nan. Despues dos di nan a lanta e cabay bek y cana bay manera nada no a pasa. Esaki a keda graba pa ciudadanonan indigna cu e “turismo di calidad” cu nos isla ta atrae.
Ta keda na e autoridadnan competente pa pone e turistanan aki responsabel pa daño causa na propiedad di pais Aruba.
