Den cuadro di Dia Mundial di Siguridad y Salud na trabou, UNCHR a haci un donacion di shete AEDs na CMO Aruba.
Lo pone algun di e AED ann den e edificio unda cu CMO ta ubica ya cu tin cuater otro departamento di Gobierno cu gran cantidad di empleado y e AEDnan lo sigura un ambiente di siguridad na trabou pa tur personal. Lo ubica e otro AED strategicamente den e CMO Mobile Medical Unit cu ta uza den evento y actividad nan grandi y durante emergencia. Tambe lo inclui algun AED den e vehiculonan di emergencia di CMO cu ta disponibel 24 ora. Tur personal cu ta usa a ekiponan menciona a haya e training necesario.
“Garantisa acceso na servicionan esencial di salud esencial pa tur residentenan di Aruba, ta di suma importancia pa UNHCR”, Irene van Rij, Head of National Office pa Aruba y Corsou, a enfatisa.” E AEDnan lo ta beneficioso p’e comunidad local y tambe p’e migrantenan y refugiadonan na Aruba.”
Ya pa algun aña caba ta existi un bon relacion di colaboracion entre UNHCR y CMO Aruba. UNHCR a haci donacion di 58 unit (RHU) cu a keda uza pa reforsa e infrastructura necesario durante pandemia y nan ta sigui uz’e durante varios otro evento y actividad tambe. Durante pandemia, UNHCR a haci donacion adicional di varios producto- y ekiponan di proteccion esencial.
“Meta principal di CMO ta pa garantisa siguridad y bienestar de henter e comunidad, specialmente den tempo di crisis. Durante e ultimo añanan, e apoyo, cooperacion y colaboracion di parti di UNHCR tabata fundamental y masha aprecia. Nos ta contento y agradecido cu e donacion generoso aki”, Eurico (Rino) Hermans, Director di CMO a indica.
E colaboracion entre CMO y UNHCR ta resalta e importancia di ta prepara pa crisis y emergencia, pa asina garantisa un futuro mas saludabel y sigur para Aruba y su residentenan.
Presente n’e entrega di donacion – UNHCR : Irene van Rij, Head National Office Aruba & Curaçao y Maya Soumah, Associate Protection Officer. Di parti di CMO Rino Hermans, Director y Rene Ridderstaat y Yvonne Geerman-Quant y Gina Lopez-Gnecco, Ketenmanager, tabata presente.
UNHCR:
UNHCR, e agencia di UN pa refugiadonan, ta un organisacion global dedica na salba bida, proteha nan derechonan y construi un miho futuro pa personanan kendenan ta oblig’e di huy for di nan hogarnan debi na conflicto y persecucion. UNHCR ta lidera accion internacional pa proteha e refugiadonan, comunidadnan cu a keda desplaza forsosamente y esunnan sin nacionalidad. UNHCR ta brinda asistencia vital,ta yuda salvaguardia derechonan humano fundamental y ta desaroya solucion cu ta garantisa cu e personanan tin un luga sigur yama hogar unda nan por construi un miho futuro. UNHCR tambe ta garantisa cu nan ta haya un nacionalidad. UNHCR ta activo den mas di 130 pais y ta uza nan experiencia pa proteha y cuida miyones di persona.
CMO ARUBA:
Crisis Management Office Aruba (CMO) ta un organisacion fundamental y multifacetico responsabel pa maneha tur situacion di crisis y emergencia y ta encarga cu coordinacion di accionnan integral riba escala nacional. CMO ta hunga un papel crucial den fortalece e preparacion y resiliencia necesario gubernamental y pa su residentenan, garantisando siguridad publico y facilitando accionnan rapido y efectivo pa mantene continuidad di operacion.
