For di diadomingo merdia tin un grupo grandi di turista pega na aeropuerto. For di 11:00 am a yega aeropuerto pa sali riba e vuelo DL612 di Delta rumbo pa New York.
Na prome instante a informa tur pasahero cu e vuelo lo sali laat (delay). Djey cada rato tabata schuif pa un ora mas. Pa 7:00 pm a dicidi di cancela e vuelo. Un stewardess a bira malo, pa cual a haci cu e vuelo no por a sigui. A purba tur manera di resolve e situacion pero no a logra. Segun a compronde, e vuelo tabata un “full flight.” E compania di ground service, esta Gen Air, a percura pa estadia y transporte pa tur pasahero. Claro, tabatin algun pasahero rabia pa cu e situacion, mirando cu pa algun, mañan ta dia normal di trabou y pa otro, tin conexion pa otro destino.
E diadomingo a bay druk pa Gen Air, mirando cu un otro aerolinea cu nan ta representa na Aruba, esta Tui, tambe a cancela. Tui mester a sali for di Aruba direccion Hulanda, pero debi na problema tecnico cu e avion, no por a lanta. A splica tur pasahero di e situacion.
Apart di e situacion tecnico, tambe tabatin un incidente cu un bentana di e avion. Parce tabatin un kraak den un di e bentanan, pa cual a scoge pa wanta e avion na tera. A tuma tur medida di precaucion necesario.
