Marlon Sneek di AVP durante conferencia, a splica cu un Gobierno cu a haya e pais, na 2009, cu un indice di desempleo di 12 porciento, cu un refineria cera y por a bah’e te na 6%, ta mustrabo un Gobierno cu a traha. Ta un Gobierno cu ta un trendsetter, esun cu a garantisa pa buta trabao pa nos hendenan haya pa nan por buta pan riba mesa, pa nan famia por come. Esey ta e Gobierno di AVP y lo bay sigui haci esaki cu e sosten di pueblo cu ta mira cada dia di nobo cu sali riba caya y bishita barionan, ta mira cu e sosten tey. Esey ta e miedo cu tin pasobra ta mira trucknan cu bandera ta sali tur dia for di diferente punto di loke ta e candidatonan di MEP aki y tur e banderanan aki ta bay cas bek. Tin hende ta campaña hunto cu sa bon bon. Tur bandera a keda riba auto y despues a bay sinta bek na un post cu tabata tin pabao di Conar pa despues bay cas. Pueblo no kier ni habri porta pa nan.
Ora cu bo ta honesto, ora cu bo ta traha habri y pueblo ta mira kico bo ta haci unda cu placa ta bay, nan sa bon bon ta pa ken nan tin cu deposita nan voto.
Por menciona proyectonan di aki pa Rusia. Poco dia por a mira un biaha mas Rosa College, un otro scol mas cu ta wordo entrega. Por a scucha e mesun lider aki a bisa cu Gobierno di AVP no a traha ningun scol. Actualmente ta bezig ta mudando Prinses Amalia. Pronto por mira SPO ta bay cuminsa cu scol pa Ofishi, pronto lo bay haya su edificio.
Esaki ta forma di traha. No djis priminti un bario, un edificio, pero traha scol di berdad. A cuminsa cu un dependence di Beatrix. Despues di esaki el a bira Prinses Amalia. Mester un edificio p’e y ata e edificio ey. A cuminsa cu un dependence di Juliana School, awe e ta un scol, Ceque, Noord tin su MAVO, awo su edificio ta bay bin.
Asina bo ta planifica, asina bo ta traha. Tur hende por corda bon cla con MEP a traha un scol na Burunbundu. Traha un edificio y scol a keda bashi. Cada biaha cu scolnan cu mester wordo renoba, mester djis plaatsnan eyden. E idea no ta pa traha edificio y bisa cu b’a traha scol. E idea ta pa traha planifica, garantisa pa bo tin e alumnonan, garantisa pa bo tin e maestronan y na e momento ey por bisa cu tin tur cos, mester tin un edificio, e ora ta trah’e y ta pone e studiante y e maestronan den dje. Asina ta traha planifica. No djis traha y tira para. E mesun hendenan aki cu ta papia di bancarota, cu megadebe, awe subi nan facebook page proyectonan cu nan ta priminti pueblo.
Bisami di unda nan ta bin si e pais ta den bancarota.
