Durante un conferencia di prensa presenta pa AVP, Marlon Sneek lider di fraccion, a splica cu tin cu keda coregi cada un di e disparatenan di MEP. Mescos por a mir’e live algun dia pasa loke ta bay bira Watty Vos boulevard, supuestamente parando pa Arubiano, parando pa yiu di tera, cu minister lo a duna OK di ekiponan pisa, sin tene cuenta cu regla.
Ta di lamenta ora cu cada biaha ta gara e mesun tipo di politiconan aki manera Dangui Oduber, manera Glembert Croes, para grita vervormente “E cos aki no por, mester para pa comunidad.”
Sneek kier sa unda e personanan aki tabata ora cu a traha Riu hotel. Hende ta come lubida. Por corda cu dia cu a traha Riu hotel, a huur e cambernan di Montaña Appartments. E tempo ey cada cama tabata pa dos hende, pasobra e shiftnan tabata di 12 ora. Esun cu drumi, ta subi bus, ora bus yega Riu hotel, esun cu caba di warda ta baha y bay drumi riba e mesun cama.
E hotel eynan, prome cu Riu hotel, Sheraton Hotel a priminti tur trahadonan cu nan lo traha den e construccion y despues cu e hotel ta cla, nan lo bay traha den e hotel. Mentira, tur hende a perde trabao.
Nan a bin cu tur hende, tur material di afo. Nan a bin cu planta di cement di afo. Tabata tin un explosion y ni ambulance por a drenta riba tereno. Esey tabata MEP. Awe por mira un Green Corridor y tur hende por pasa mira cua ta e ekiponan cu ta traha eynan. Tur hende sa bon cla di unda e asfalt cu a traha e caminda a bin. Ta di produccion local. Awe por mira un proyecto cu a wordo duna, of un bidding cu a wordo gana. A sinta papia cu e hendenan aki na mesa y bisa cu tin cierto ekiponan cu a tuma nota cu no tin, of cu no tin suficiente y kier tin e trabao eynan riba cierto pace pa por caba na tempo. Den bida di construccion na momento cu no caba na tempo, ta nifica boet y perde placa. Nan a bisa bon cla, cu si tin ekipo na Aruba nan ta uz’e. Den planning, loke a haya na ofertanan cu tabata tin, tabata mustra cu lo tin un korting di un cantidad di ekipo y pesey nan a haci y bin cu nan mesun ekipo pa por garantisa cu nan ta bay mantene nan mes den e tempo stipula.
Un biaha mas, manera cu a bin ta bisa, a pidi minister tuma accion di biaha, wak kico ta pasando, pa por garantisa cu nos hendenan local ta haya trabao. No manera esunnan di MEP tempo di Riu a bira lomba pa pueblo, duna e doñonan di Riu tur autoridad pa trece trahado di afo, trece tur material di afo. Un planta di cement, tur hende por corda e explosion aki. Ambulance a para na porta nan no kier habri porta. Polis no por a drenta e area. Esey tabata e situacion.
