Pa Christine y Micheal McKenna, Aruba ta hopi mas cu simplemente un destino di vakantie. Despues di a bishita e isla pa di prome biaha na 1986, nan a bolbe mas di 100 biaha y awo ta considera Aruba nan di dos cas.
Nan prome bishita a bini despues di añanan di tuma vakantie tur aña na maart y bishita diferente destino den Caribe. Nan agencia di biahe a recomenda varios luga, incluyendo Acapulco, Cancun y diferente isla Caribeño, prome cu el a sugeri pa nan purba Aruba. “E tempo ey, mi no a ni yega di scucha di Aruba,” Micheal a corda.
E agencia di biahe a sigura nan cu Aruba tabatin tur cos cu nan a gosa di dje na e otro destinonan cu nan a bishita, sin e cosnan cu nan no tabata gusta. E recomendacion a resulta di ta hopi exitoso. Awe, e pareha ta sigui bolbe e isla regularmente. Desde 2007, nan ta bishitando Aruba cinco biaha pa aña, normalmente kedando pa dos siman cada bes.
E garantia di un dushi clima ta un gran parti di e atraccion, pero nan ta bisa cu e hendenan ta e motibo di mas grandi pakico nan ta sigui bolbe. “Nos ta adora e localnan completamente,” Christine a di, splicando cu nan hasta tin varios amigo riba nos isla, tanto local como turista. Nan ta disfruta di e ambiente caluroso, e estilo di bida relaha y e amabilidad di nos hendenan.
E pareha ta aprecia tambe e restaurantnan di Aruba y naturalmente, su beachnan bunita. “Nos ta stima ‘chill’, y ‘Balashi’ tambe. Con bo por surpasa esey?” Micheal a bisa.
A pesar di nan conexion fuerte cu Aruba, e pareha nunca a considera pa haci e isla nan cas permanente. Nan cas principal ta keda na Massachusetts, caminda nan tin famia. Pa nan, e echo di por biaha libremente entre e dos luganan ta parti di loke ta haci e areglo aki funciona. “E ta un segundo cas pa nos, pero e no ta nos cas principal,” nan a splica. E vuelo directo y facil entre Boston y Aruba ta haci e bishitanan frecuente relativamente facil tambe.
E conexion di e pareha cu Aruba ta bay mas aya di simplemente bolbe e mesun destino di vakantie. Prome, nan tabata keda na Divi Divi y despues nan a dicidi di cumpra un timeshare. Despues di mira propaganda pa condominio, nan a dicidi di explora e posibilidad di bira doño di un condominio na Oceania Residences y finalmente a namora di e idea. Aunke nan tin e timeshare ainda, mayoria di biaha nan ta scoge pa keda na Oceania Residences.
Despues di tanto bishita, e pareha ta sinti nan mes comodo tambe pa move rond di e isla riba nan mes. Nan ta balora particularmente con sigur nan ta sinti na Aruba, recordando cu nan a bishita otro islanan caminda tabata conseha turistanan pa no sali di nan resort y caminda tabatin agentenan arma staciona rond di e propiedad. Nan a bisa cu nan nunca a experencia e mesun sensacion ey na Aruba. “Mi ta sinti mi hopi sigur aki. Mi por cana rond libremente. Tur cos ta ok. Tur hende ta amabel. Tur hende ta disponibel di yuda.”
Nan a hasta siña un par di palabra y frase na Papiamento den transcurso di añanan, incluyendo “Bon dia,” “Bon tardi,” “Bon nochi,” “Bonbini,” “Masha danki” y “Igualmente.” Nan ta admiti cu nan lo kier papia mas di e idioma local, pero nan ta bisa cu e ambiente multilingual di e isla ta sigui asombra nan. Un di e amigonan di e pareha, nan a splica, por papia cu diferente hende na Ingles, Papiamento, Hulandes y Spaño, un cos cu nan ta haya remarcabel. “Ami ta lucha cu Ingles mes,” Micheal a broma.
Cuminda a bira un parti importante di nan rutina na Aruba tambe. E pareha ta gosa di purba diferente restaurant y a bisa cu tipicamente nan ta come pafo tur anochi durante nan estadia pasobra tin asina hopi luga cu nan ta gusta. Entre nan faboritonan ta Chalet Suisse, Terraza Italiana, Anno, Barefoot, pa nombra algun.
A pesar di e hopi cambionan cu nan a presencia desde nan prome bishita na 1986, e pareha ta bisa cu e cambionan ey no a afecta nan experiencia. Nan a nota un aumento significante den construccion, mas hende y mas auto riba e isla. Nan ta corda tambe un tempo cu Aruba no tabatin asina hopi rotonde. Pero nan ta comprende cu desaroyo y turismo ta parti di e crecemento di e isla. “Turismo ta loke boso ta biba di dje, of no?” Christine a bisa.
Despues di cuater decada di bolbe Aruba, e pareha a mira e isla evoluciona mientras e ta mantene e cosnan cu ta sigui atrae nan bek: e clima, beachnan bunita, cuminda delicioso, siguridad y, riba tur cos, e hendenan.
Ora a puntra nan kico Aruba ta significa pa nan personalmente, nan contesta tabata simpel: “E ta nos ‘happy place.
