E conteo final pa e gran anochi di STREA Deportivo 2026 ta oficialmente den su fase final. Faltando solamente dos dia, Aruba ta prepara pa celebra, reconoce y honra e mihonan den deporte durante STREA Deportivo Aruba 2025, cu lo tuma luga diasabra awo, 5 di september 2026.
STREA Deportivo ta un momento special dedica na e atletanan y deportistanan, cu disciplina, perseverancia y dedicacion, a logra destaca durante aña deportivo 2025. Riba tereno, den awa, riba pista y den diferente disciplinanan deportivo, nan a duna tur di nan mes y representa Aruba cu orguyo.
Minister di Deporte, mr. Gerlien Croes, ta enfatisa e importancia di reconoce no solamente e resultadonan logra, sino tambe e sacrificio y compromiso cu ta tras di cada prestacion den disciplina di mayoria deporte na Aruba.
“Tras di cada logro tin dia- y oranan di entrenamento, disciplina, sacrificio y perseverancia. STREA Deportivo ta e momento pa pone nos atletanan den centro y duna nan e reconocemento cu nan merece pa loke nan ta logra pa nan mes y pa Aruba”, Minister Gerlien Croes a expresa.
E nominadonan ta cla y expectativa ta creciendo pa un anochi caminda comunidad deportivo lo reuni pa celebra excelencia, talento y ambicion.
Minister mr. Gerlien Croes ta felicita tur nominado y ta invita comunidad pa celebra hunto cu e atletanan cu ta continua na inspira futuro generacionnan pa soña grandi, traha duro y pone metanan grandi nan dilanti.
“Dia 5 di september nos ta cana e Caminda pa STREA Deportivo, celebrando e streanan cu ta haci Aruba briya den deporte”.
Faltando solamente dos dia pa STREA Deportivo!
