“Orange The World” ta un campaña internacional cua yega Aruba tambe. Fundacion Contra Violencia Relacional den un conferencia di prensa a anuncia inicio di e campaña aki pa crea conscientisacion riba violencia contra hende muhe y mucha muhe. Rish-Ann Ammerlaan, trahado social cu e fundacion aki a hiba palabra durante un conferencia di prensa.
E ta un campaña di 16 dia cu ta inclui un marcha y e campaña di poster titula “ Paving the Pathway to Gender Equality”.
E ta un campaña cu nan ta realisa hunto cu Centro di Desaroyo di Hende Muhe (CEDEHM), UNHCER (United Nations Refugee Agency, HIAS, y Soroptimist International Club.
Ta trata di un campaña internacional cu ta cuminsa riba 25 di november, cu ta e Dia Internacional pa Eliminacion di Violencia contra Hende Muhe y ta core te cu 10 di december, cu ta e Dia di Derecho Humano.
E tema selecciona e aña’ki ta “Unite! Invest to Prevent Violence against Women and Girls”. Esaki ta un invitacion pa bin dilanti y apoya diferente strategianan preventivo pa pone un paro na violencia.
Diasabra awo tin e lansamento oficial di e campaña, cuminsando cu un marcha pa presenta na Bestuurskantoor unda tin inicio oficial di e campaña. Pa 5:00 pm e marcha ta sali for di edificio di corte y ta finalisa 6.30 na sede di Gobierno. Lo cende e luga den color oranje.
Pero tambe lo tin charla na diferente MFA-nan. Ta organisa e charlanan aki hunto cu CEDEHM, Futura, Impact Hop y Centro di Desaroyo Humano cu ta dirigi riba entrepreneurs. Tin tayer pa mucha muhe di entre 12 pa 18 aña papiando riba Safety Online.
A papia tambe cu hende muhe riba caya tocando e tema riba siguridad di hende muhe. Lo duna e resultado durante e periodo di campaña.
Durante e campaña lo tin un poster colga na diferente localidad rond Aruba, entre otro na e MFA-nan y BNA.
El a bisa cu nan ta sinti cu e casonan di violencia ta keda bini dilanti y ta mustra mas hopi. Pero esaki ta debi cu e hende muhe ta hayando curashi pa bini dilanti. E por bisa si cu tin hopi hende muhe cu ta sinti nan mes insigur riba caya.
Pa e temporada aki ta encurasha pa crea mas consciencia riba violencia, uni na e fundacion su actividadnan y cende luz oranje na cas of na negoshinan.