Partij voor de Vrijheid (PVV) di Geert Wilders ta na cabes di encuesta na salida di votacion. Tur cos ta mustra cu e resultado di eleccion ta cu PVV tin 35 asiento. Den e anterior eleccion pa Tweede Kamer, na 2021, e partido aki a haya hopi menos asiento: 17
Esnan cu ta sigui PVV, segun e compania di encuesta Ipsos ta hopi cerca di otro pa bisa sigur. Pero si ta papia di indicacion e ta GroenLinks-PvdA di Frans Timmermans cu ta para na 25 asiento (anteriormente a haya 17) y VVD di Dilan Yesilgöz cu 24 (mientras cu na 2021 a haya 34).
E partido nobo NSC, e partido di Pieter Omtzigt, den e encuesta ta sali como e di cuater partido cu 20 asiento.
NOS
Entre NSC y e partidonan chikito tin un buraco grandi: e prome partido cu ta sigui despues di e grupo ey ta D66 cu 10 asiento (anteriormente 24) y BBB cu 7 asiento (anteriormente 1 asiento). Despues ta sigui CDA y SP, ambos cu cinco asiento.
FvD, CU, Denk, PvdD y SGP den e ultimo encuesta na salida ta para na 3 asiento. Volt ta bon pa 2 asiento, 50plus y JA21, ambos cu 1 asiento. Si e encuesta aki na salida ta cuadra cu e resultado final, BIJ1 y BVNL no ta bolbe den Tweede Kamer.
