Awe Banco Central di Aruba (BCA) ta publica un actualisacion di e ‘Economic Forecast Monitor’ (EFM) riba su website.
E EFM ta duna un bista riba proyeccionnan economico, ambos local y internacional, door di diferente institucion. E actualisacion aki tambe ta inclui proyeccionnan local revisa cual BCA a publica anteriormente den su ‘Economic Outlook’. Un resumen di e proyeccionnan aki ta presenta abou.
Pa 2018, e produccion economico ta proyecta pa crece cu 0,3% (den termino real), significantemente mas abou compara cu e estimacion anterior, cual ta causa primordialmente pa inversionnan comercial limita y falta di actividadnan relata na refineria. No obstante, 2018 lo ta e di dos aña sigui di crecemento positivo, despues di un crecemento estima di 1,2% na 2017. Sinembargo, e proyeccion aki no ta tene cuenta cu efectonan (in)directo di e ‘heffing’ nobo y por lo tanto ta suheto na riesgonan cu lo por baha e proyeccion.
Ta premira cu actividadnan turistico lo sigui aumenta, impulsa pa un continuacion di e crecemento den e cantidad di bishitantenan procedente di Merca. E sector di turismo lo keda e motor di crecemento cu un expansion estima den ingreso turistico (+2,4%) y den e cantidad di bishitantenan (+0,3%). Ingreso turistico ta proyecta pa crece significantemente den e prome trimester di 2018 y lo keda positivo durante e resto di e aña (Grafiek).
Sinembargo, BCA ta premira un caida leve den bishitantenan durante e di dos y di tres trimester di 2018. Consumo priva ta estima pa permanece na e nivel di 2017 den termino real, mientras cu inversion priva ta proyecta pa baha cu 0,3%.
Riba e mercado internacional, e tendencia den pronosticonan actual ta indica cu institucionan financiero ta parcialmente mas optimista riba e desaroyonan economico na Merca y e paisnan cu ta cai bou di e euro. Na 2018 e perspectiva riba tanto e Producto Domestico Bruto (PDB) real como e nivel di desempleo ta mas faborabel compara cu tres luna pasa. Especialmente e perspectiva riba e mercado Hulandes ta positivo actualmente. Na Merca y den e zona di euro, PDB real pa 2019 ta proyecta di ta un poco menos fuerte, mientras cu e nivel di desempleo probablemente lo sigui cai. Inflacion lo permanece cerca di 2%, cual ta wordo considera modera. Opinion consenso riba e tasa di cambio di euro ta cu lo mira un leve apreciacion durante e siguiente 16 lunanan yegando te na 1,29 dollar na fin di 2019.
Evaluacionnan pa e economianan latino americano ta positivo cu un PDB di entre 2% pa 4% na 2018 y 2019 cu un tasa di inflacion cu lo keda bou di 5% den mayoria di paisnan. Excepcionnan negativo notabel ta Venezuela y Argentina. Economianan den Caribe ta proyecta pa crece cu 3,1% na 2018 y 2019 cu un promedio di inflacion un tiki bou di 4%.
Ta premira cu prijsnan di petroleo lo aumenta pa un averahe di US$ 61 pa baril na 2019. Ademas, e prijs di oro ta estima pa subi pa US$ 1.336 pa troy ounce.
| Proyeccion selecta di PDB y prijsnan di materia prima (2017-2019) | ||||
| Indicador | 2017 | 2018 | 2019 | |
| PDB real (porcentahe di crecemento) | ||||
| Aruba | 1,2 | 0,3 | n.a. | |
| Caribe | 2,7 | 3,1 | 3,1 | |
| Latino America | 1,3 | 2,2 | 2,6 | |
| Mundo | 3,8 | 3,6 | 3,6 | |
| Merca | 2,3 | 2,7 | 2,4 | |
| Zona euro | 2,4 | 2,2 | 1,9 | |
| Prijsnan di materia prima (averahe) | ||||
| Prijs di petroleo (WTI, US$/baril) | 51 | 62 | 61 | |
| Prijs di oro (US$/oz) | 1.258 | 1.300 | 1.336 | |
