Diaranson anochi manece diahuebs marduga, pa mas of menos 12:30 am, a sosode un accidente basta fuerte n’e crusada di Wendy’s Palm Beach. E vehiculonan envolvi ta un Jeep modelo Wrangler numera V-1607, cu no a duna preferencia y a dal den un van color shinishi, marca Hyundai, modelo H1 numera Tx-120.
E taxista tabata riba su caminda di preferencia, el a purba brake pero no a logra. E jeep a gewoon sali su dilanti y purba crusa riba e caminda grandi sin paga tino cu e taxista tabata biniendo.
E taxista a conta cu el a caba di baha su pasaheronan, pues no tabatin ningun hende abordo. Su taxi ta sigura, pero “tercera parte” debi cu e auto ta di aña 2016.
Den e jeep tabatin dos hende homber. E chauffeur turista ta drenta enlace matrimonial awe mainta, pues pa su mala suerte a accidenta algun ora leu di su casamento.
Aparte cu e ta casa awe mainta, awo e lo yega su hotel herida tambe, pasobra el a kibra e windshield cu su cabes durante e impacto. Ambulance a transport’e pa hospital p’e ricibi atencion medico avansa.
