Maduro & Curiel’s Bank y su grupo di banconan ta pidi disculpa pa un interupcion di servicio diasabra ultimo entre 3’or di atardi y 7’or di anochi.
Durante e oranan aki tur sistema di pago, Bancomatico y Online Banking di CMB a cai afo. E ekipo di IT (Information Technology) mesora a traha riba e problema y tur servicio a keda restaura pa mas o menos 7’or di anochi. CMB ta ofrece su disculpa pa e inconveniencia y consternacion cu esaki a causa.
E team di IT a sigui traha pa por a determina kiko por a causa e interupcion di servicio pa esaki no tuma luga mas. Ta resulta cu un eror a surgi durante mantencion regular di nos red cu a resulta cu nos servicionan di ATM, POS y Online Banking a cai afo. Pa por a restaura e servicionan un cantidad di proceso tecnico mester a tuma luga pa garantisa reestablecemento adecua di nos servicionan na nos clientenan. Esey a tuma luga instantaneamente y a resolve e problema completamente diasabra mes pa 7’or di anochi.
Un biaha mas nos ta pidi nos disculpa pa loke a sosode, pero nos ta contento cu e problema a keda resolve pa nos por sigui brinda nos clientenan e servicio cu nan ta custuma cu ne.
