Dialuna merdia a tuma luga cierre di e aña Parlamentario. Sinembargo na e ocasion aki, un parlamentario en particular a hiba su discurso di despedida.
Sue Ann Ras a para na e podium pa di ultimo biaha, gradiciendo pueblo di Aruba y specialmente esnan cu a pone confiansa den dje. Cu a permiti’e ehecuta e funcion como parlamentario di Aruba.
Ras no a logra termina su termino, pero den bida, tur cos ta pasa pa un motibo, el a bisa. E no kier pa entre otro su votadonan sinti den ningun momento so cu nan voto no tabata tin validez. Al contrario. E ta desea pa nan tambe, mescos cu su mes, wak cu nan voto a nifica e cambio cu tanto a anhela den politica. E cambio cu ta bay bek na nos norma y balor y amor inmenso y sincero pa nos pais Aruba y su hendenan.
Ras tabata referi na e cambio, caminda como mandatario di e pais aki, mester traha incansablemente y hustamente pa cada ciudadano di e dushi isla aki, cu nos ta yama Aruba. E cambio cu a visualisa y planifica un miho futuro pa nos mucha y hobennan, specialmente riba e aspecto di educacion, cu tanto nos mester reconstrui, inverti y eleva.
Den transcurso di casi 2 añanan aki, Ras a bisa cu el a siña y a experencia hopi. El a conoce y a traha cu hopi hende y a siña haya mas aprecio pa cada momento cu e por a comparti den comunidad, como un digno miembro di Parlamento.
Un funcion cu ta huramenta p’e y cu ta simbolisa un promesa “naar eer en geweten” y cu mester keda ehecuta asina tambe. Siman pasa el a elabora riba su pagina di Facebook, e motibo cu e no por a asumi bek e encargo como parlamentario.
Ras ta gradici di curason su coleganan parlamentario di fraccion di MEP, cu a brinda nan sosten enorme y di curason y sigur a duna tur di nan banda pa convenc’e. Sin kita afo henter su partido y demas coleganan cu ningun momento a bira lomba p’e.
Pero, el a bisa, e mes ta esun cu a dicidi otro. Su decision tabata referi na e liderazgo moral, cu ta di suma importancia pa nan asumi. Ora cu tin e funcion di mas halto den un pais, e liderazgo mester tin un fundeshi profundamente ancra, cu mester conduci cada un di nos pa tin un cuadro moral y set di principio cu ta indica con e lidernan mester actua den tur loke nan ta haci, con nan mester interactua cu otro, con nan mester tuma decision y con nan mester conduci nan mes.
