Diamars a tuma luga e apertura di Solucion di Conocemento Tradicional di Cambio di Clima y Resiliencia den Caribe. Esunnan cu tabata presente ta di pensamento cu ta importante pa comparti nan conocemento y busca solucion riba e situacion di cambio di clima.
Robertina Gutierrez Ipuana ta un di e invitadonan dje congreso di e cambio di clima cu ta tumando luga rond henter mundo. El a splica cu den e congreso aki nan ta duna conocemento di tur pero di cada pasado y presente. Asina ey por trece nan conocemento y mira con por vence un poco e cambio di clima cu tin rond mundo.
Den diferente parti di mundo a tene caba dicho congreso, incluso algun tempo atras a tene uno na Aruba cu ayudo dje museo. Awo ta bay traha mas riba e tema aki pa organisa y aporta nan conocemento pa minimisa e cambio di clima.
El a splica cu den e parti di Guajira ta educa riba e parti di awa, con ta come, kico ta e recursonan cu tin. Ta trece hopi e conocemento. Pa loke ta na Aruba, nan ta bay purba di trece e conocemento na tur mucha, hende grandi pa siña mantene e cambio climatico cu tin.
Pa Thanya Sokè Fonkel, invitado, esaki ta un fenomeno nobo, pero e ta un fenomeno mundial cu na Surnam tambe ta enfrenta. Nan no sa con pa atende cu ne, pero ta keda adapta nan mes. Ainda tin hopi cos cu nan ta investigando con pa sigui.
Loke nan kier saca dje tayer aki ta scucha experencia di otro persona, otro ciudad. Haciendo un comparacion, na Surnam nan no tin desaster natural grandi, unda hopi hende ta perde nan bida of hopi area ta bay perdi. Pero pa nan ta importante pa sa con pa anda cu perdida di material of con pa atende cu nan area di vivienda.
Irvince Auguiste, invitado, a splica cu ta di suma importancia pa nan comparti nan conocemento, pasobra e cambio di clima ta afectando globalmente. Cada pais, comunidad y isla ta adresa esaki diferente. Tin persona no tin conocemento dje topico aki. Esunnan cu si tin e conocemento mester pasa esey y educa otro pa adapta n’e cambionan.
E ta di pensamento cu comunidad tambe mester cuminsa yuda pa minimisa e cambio di clima. Si no por siña con pa trat’e, e ora ey e ta un reto grandi p’e gobiernonan.
