Por lo menos dos di e unico Rum Shopnan situa pariba di brug awe a uni den un protesta contra maneho di crisisteam y DVG pa cu nan. Ta sinti cu maneho di gobierno ta discriminatorio y ta cabando cu e rum shopnan, cu tin permisonan riba 50 aña caba. Si no cambia e maneho pronto, por spera cu varios lo mester cera nan porta nan pa semper.
Rodhlann Geerman, nieto di e doño di Miramar Rum Shop sitia na Noord Cura Cabay # 131 a sigura cu nan mester a cera na maart caba ora e pandemia a yega Aruba. A permiti nan habri na juni bek y despues mester a bolbe cera dia 5 di augustus atrobe. Y di e dia ey nan ta cera, pues tres luna caba, sin ningun entrada pa cubri nan gastonan.
E mesun situacion ta cu Pos Chikito Rum Shop tambe, cu a uni na e denuncia via 24ora.com. Nan permiso ta anticua y Gobierno pa un motibo of otro no kier cambia nan permiso. Y nan mester sinta man crusa mira tur restaurant Chines, minimarket y hasta supermercado fungiendo como bar ultimamente. Nan si mester keda cera pasobra no por permiti cliente para na bar.
Nan ta pidi pa permiti nan sikiera habri y bende na porta. Clientenan lo mester cumpra nan productonan y bandona e sitio mesora. Asina mayoria restaurant tambe ta manehando sin problema. Pasobra ningun negoshi por wanta tres luna cera asina, sigur ora abo mester keda cera pero ta permiti pa bo clientenan bebe na bo bisiña si, pasobra e tin permiso di minimarket.
Ta urgi gobierno pa tuma un decision den e asunto aki. Of ta yuda economia of ta promove pa mas negoshi cera nan portanan pa semper.
