Diferente persona a yama 24ora.com pa mustra cu WEB no ta tumando e reglanan di social distancing na serio y cu nan tin un cantidad grandi di personanan trahando riba caya, den area di Pos Chiquito.
E team di 24ora.com a bay y a constata cu berdad riba e ruta di WEB bay ariba a topa cu un cantidad grandi di personanan trahando rond di e tubonan di WEB. Segun por a compronde, gerencia a dicidi di haci un mantencion den e areanan di tubonan di e empresa. Asina awe for di mainta tempran por a mira grupo grandi di trahado (no ta conoci si ta di WEB of compania priva) for di cuminsamento di Dieselstraat, bay ariba te yega Savaneta.
Rond di e tubonan tin masha hopi mata y yerba. Y por a constata cu door di e temporada di poco yobida, esakinan a bira seco y ta vulnerabel pa candela. Ultimo dos simannan tabatin masha hopi candela di candela y hopi intencional. Si esaki mester sosode banda di e tubonan di WEB e por ta un peligro grandi.
E tipo di trabou aki ta masha importante pa evita cu cualkier desaster por tuma luga.
Pa ehecuta e tarea aki a uza un grupo grandi di trahado y tin personal di WEB, segun vocero di e compania, cu ta controla cu ta cumpli cu e regla di distanciamento social riba henter e ruta.
