Trahadonan di Piscina Olimpico Roly Bisslik kier nan placa completo y a para pafo mustrando nan mal contento. Ta trata aki di por lo menos 20 persona.
Piscina Olimpico hunto cu Community Pool, ta cay bao di Fundacion pa Maneho di Facilidadnan Deportivo y e trahadonan di e ultimo aki a join esnan di piscina olimpico.
John Henriquez, shop Steward di SEPPA, a splica cu e situacion aki ta stobando pa basta dia. Pero awo si awa a pasa hariña. E ta conta cu dia 10 di januari mester a haya bashi premie, pero nan no a hay’e.
A splica nan cu tabata tin un problema y e placa no a pasa pa e trahadonan di Piscina Olimpico. Apesar di a insisti na varios ocasion pa un splicacion pa sa unda e placa ta, loke a haya pa contesta ta cu no sa unda e placa ta of ki dia e placa ta pasa riba nan cuenta di banco.
Varios dia a pasa te cu a yega dia 22, pero nan no a cobra. Diamars, ora cu a yega parti atardi ta haya un carta bisando cu te ainda, e momento eynan, no tin un claridad ki dia ta cobra nan salario y tambe bisando cu e bashi premie cu mester a haya dia 10 di januari ultimo, ta bay hay’e, pero 50% so.
Esaki a cay den mal tera cerca e trahadonan. Tur hende sa cu december ta haci extra gasto, etc. Ta spera riba e bashi premie completo, manera semper ta hay’e. Segun Henriquez, e trahadonan tambe tin derecho di haya esaki 100%.
Awe, 27 di januari, ta haya e informacion cu e placa ta riba cuenta y ta keda na banco ki dia y ki ora e ta pasa. Loke a bisa e trahadonan cu e bashi premie no ta bay pasa cu nan salario. Tampoco sa ki dia nan lo haya esaki. “No tin un dia exacto. No tin claridad riba esaki tampoco. Ta sigura si, cu ta 50% so ta bay pasa, ora cu esaki tuma luga. Pa e trahadonan esaki ta inaceptabel,” segun Henriquez. Ta pa e motibo aki tambe e trahadonan a pone trabao abao.
Henriquez a splica cu net prome cu nan accion, director di e fundacion, Jacintho Werleman, kende no tabata presente na e facilidad, a splica cu mañan diahuebs ta bay tin reunion di directiva tocante e asunto aki.
Palabranan di Werleman ta indica cu nan ta bay dialoga riba e otro 50% di e bashi premie. Henriquez a contest’e cu no mester di dialogo riba esaki. Mester paga 100%. Tur otro fundacion a hay’e. No ta mira kico mester dialoga riba dje.
