E trahadonan Fundacion pa Maneho di Addicion Aruba (FMAA), esta Centro Colorado, a welga pa mustra nan malcontento. E trahadonan no ta contento cu e situacion nan ta trahando aden y p’esey nan a manda un carta p’e gobierno demisionario cu diferente punto. Si pa diabierna nan no haya un contesta, e siguiente stap cu e trahadonan tin pensa di tuma ta un welga.
Nan ta spera cu e minister encarga cu nan por cuminsa trece solucion na nan problema. E puntonan poni riba e carta ta como lo siguiente:
- No ta traha warda mas nan so;
- Nan no ta parti pildo p’e clientenan;
- Luga no ta apto pa traha ni p’e clientenan, ya cu e edificio ta yen di schimmel y esaki ta perhudica nan salud;
- Tin problema serio andando cu placa di cliente. E trahadonan ta hayando keho cu cliente ta frustra pasobra no ta haya nan mesun placa. E trahadonan no sa kico ta pasando y ta purba di trankilisa e clientenan riba esey. A priminti nan di haya esaki, pero tres siman a pasa y nada ainda;
- E trahadonan tin cuater anda sin haya uniform;
- Bevordering ta pega;
- Ta tuma cliente cu ta y/of no ta adicto;
- Tin di atende cu cliente masculino y femenino na mes momento;
- Ta pasa den situacion inaceptabel, manera cliente a menasa of falta respet na un otro cliente of staf y ta sac’e cu polis. E procedura ta indica cudespues di seis luna ta tuma e cliente bek. E trahadonan no ta acepta esaki.
FMAA ta un fundacion cu ta tiki trahado y no por sigui asina. Tin hopi punto cu nan kier atende cu ne. Nan kier mira un solucion riba e puntonan aki y ta spera di haya contesta mas tarda diabierna. En caso cu no haya contesta, nan lo welga.
