Un persona cu a traha den imprenta di Solo di Pueblo pa diesun aña ta pasando awo den un momento fastioso. Esaki ta debi cu Edmond Croes no a tene su mes na ley laboral.
Luis Alvaro Delgado, ex-trahado di Solo di Pueblo, a bay na Departamento di Labor, pero nan no ta yud’e cu su situacion. El a splica di a traha cu Croes pa diesun aña y den e periodo di pandemia, desde januari, el a cuminsa haya problema cu ne p’e pago di salario. E situacion a yega asina leu cu pa dos luna e no a haya su salario. Croes a aplica un regla, un ley, di cual el a bisa Delgado cu e ta un ley di Aruba di ‘no work no pay.’ Hopi hende a bisa Delgado cu e ley ey no ta existi.
Posteriormente den luna di augustus, el a probecha cu gobierno, momento di pandemia, a saca e ley di reduccion di salario. Aki a bis’e cu di su salario nan tabata kita 405 florin pa luna pa motibo di e ley aki. A kita e ley aki dia prome di september 2021, pero e no tabata sa di esey. Despues el a haya sa y di biaha a bay reclama.
A bin bis’e cu e no ta reduci su salario pasobra e no a cay den e ley ey. Segun Delgado, Croes a bis’e di a mand’e un carta unda tabata ofrece salario pa cierto circunstancia, di cual e no tin nada ke haber. E ex-trahado ta para ariba cu e no tabata sa di e carta y apenas a bin haya sa di esaki den luna di april of mei.
Pa tres aña a kita for di dje 405 florin sin ningun argumento real cu e por wanta. El a reclam’e riba e situacion, di cual na 2020 Croes a cuminsa pag’e su salario tiki tiki, aparte di reduci esaki cu mentira. Croes a bis’e cu e ta doño di berdad.
Incluso su persona a bisa Croes cu e tin un codigo laboral bou di su lessenaar personalisa unda e ta haya beneficio y e trahadonan ta haya completo e perhuicio.
Despues cu el a reclama Croes p’e placa cu deb’e, pero aki el a haya un carta di renuncia. Croes ta un cobarde, pasobra e no ta sali for di su haula, pero el a presenta na Departamento di Labor pa bisa cu nan a yega na un acuerdo, pero segun Delgado, esey nunca a pasa.
El a enfatisa cu no por sinta combersa cu Croes, pasobra ora mester di algo pa un luna largo mester pleita cu ne pa por haya un payslip. Tin hopi coherencia, forma vulgar con e ta trata un empleado.
Delgado a pasa tres aña den necesidad, mirando cu dia di pago tabata 5 di luna, pero e mester a yama dia 8 pa bis’e cu e tin huur pa paga. Croes tabata presenta pa dun’e 400 florin, pero esey no ta loke e ta paga na huur, cumpra cos di come, etc. Den tres aña di tempo el a sufri na man di Croes.
Awo Croes ta nenga di pag’e e tres lunanan di pre aviso. Segun Delgado, na Departamento di Labor a saca un papel indicando cu Croes tin di pag’e e tres lunanan di pre aviso, cual e ta nenga. Tambe mester pag’e e dianan di vakantie, pero no ta haci esey. Croes tin su mesun ley y e no ta cuadra, pasobra si ta traha seis biaha pa siman ta 19.6 dia di vakantie e tin pa aña. Incluso a pone vakantie cu nunca e tin. E ta nenga di a biaha pa Colombia un 11 di december y regresa 24 di januari.
Croes a pone dia di vakantie cu Delgado a pidi, pero tambe Croes no ta respeta e ley manera e ta. Croes a keda cu e dianan vakantie. Pa loke ta e cesantia, segun Delgado, el a haya un carta bisando cu supuestamente nan ta bay pag’e den tres luna, pero te fecha di awe e no a ricibi nada.
