E trahadonan di Post Aruba N.V. a cuminsa manifesta siman pasa diahuebs cu dos ora unda nan tabata warda pa gerencia scucha nan. Momento cu esey no a pasa diabierna nan a bolbe bay den manifestacion pa cuater ora y un biaha mas no a tende nada di gerencia. Esey a pone cu nan a dicidi di haci esey un biaha mas pero e biaha aki pa ocho ora.
Eusebio Kelly, shop steward, a splica cu siman pasa diahuebs nan no a haya contesta di gerencia, diabierna cuater ora y nan mester a haya un contesta di gerencia pero no a haya nada. E trahadonan a indica cu nan ta tuma henter un dia y tanten cu nan no haya un contesta, nan no ta drenta edificio di Post pa traha. E problema ta cu gerencia kier bay c’un CAO nobo y no kier cumpli cu esun bieu. Hopi di e trahadonan a bay atras cu 105 florin y esey nan ta bezig ta pleitando, y no pa otro cos.
El a expresa ora nan mester tabata solidaridad, nan a cumpli, unda a kita algo fo’i nan. Pero awo cu nan mester haya nan parti bek, a bisa nan cu no tin placa. Segun Kelly, nan a tene placa di tur trahado aden. Esey ta significa cu Post mester duna nan bek 105 florin. Ora a kita placa fo’i nan, mester a kit’e fo’i nan placa di vakantie y bonus. Pa loke ta trata e 105 florin no tabata hinca den dje, pero e compania a wanta esey. Awo ta bisa e trahadonan cu nan no tin e placa ey y siendo cu gerencia a bisa di tin e placa wanta. Kelly a expresa cu e no ta 105 florin, sino 210 pa motibo cu tin dos aña cu nan no a cumpli cu ne. El a sigui splica cu nan kier kita e 105 florin, pero nan ta laat pa haci esey.
Secretario general di SEPPA, Magaly Brito, a yega di bay riba e punto cu gerencia ta bisa di no tin placa, pero ta sigui tuma hende den servicio. Kelly a splica cu nan a tuma dos trahado cu a bin yuda via TEMPO, pero nan ta riba contract. Asina mes nan falta di personal, pasobra Bestel dienst, aunke tin e dosnan aki, falta cinco pa seis trahado ainda. Tin hende a bisa cu Post ta keto, ya no ta manda carta, pero Kelly a splica cu nan tin trabou. Aunke carta a baha un tiki, nan tin otro tipo di trabou.
