“Gremio no a opone e concepto di sugar tax na 2019”, asina Tisa LaSorte di AHATA, a skirbi awe como contesta pa e declaracion di Minister Dangui Oduber. E ultimo a acusa comercio y gremio di a boicotia introduccion di Sugar Tax na september 2019. E tempo ey, di acuerdo cu e calculacionnan cu Gobierno a propone, cu un bleki di refresco lo a costa mas cu un cerbes!
Tisa LaSorte, den representacion di gremionan a sigui splica awe cu “A recomenda pa e sugar tax tin base hancho, cual ta baha e grado di impuesto y tin miho efecto pa scapa gasto di salubridad. Dus pa e ta riba tur producto di sucu y no solamente un producto. Esunnan cu tabata den e reunion na 2019 sa esey”.
E discusion di 3 aña pasa
Gobierno di Aruba a anuncia cu den su reforma fiscal, programa pa drenta na vigor dia prome di januari 2020, cu lo introduci un sugar tax. De facto, Gobierno a yam’e “Accijns op water met toegevoegde suiker”. Loke ta haci ta cobra 270 florin na accijns riba cada hectoliter di e producto. Consecuentemente, mas bo consumi, mas bo ta paga na belasting.
Aruba lo a bira esun mas caro pa refresco
Cu e cambio fiscal aki, Aruba ta pasa pa bira e pais cu e nivel di belasting mas halto na mundo riba benta di refresco. Hopi mas cu Merca y mayoria pais Europeo. E estudio ta basa riba benta di 1 liter di refresco den supermercado.
Prijs den tienda lo aumenta drasticamente
Pero, pa pone e prijsnan den perspectiva, ata aki un presentacion facil. Por ehempel, un bleki di Coca Cola awor costa 2 florin den supermercado. Cu e nivel di accijns nobo, e prijs ta subi na 3 florin pa cada bleki di refresco, pues un aumento di 50%. Un botter di 20 ons di Coca Cola, awor aki costa 2,25 den supermercado, pero lo añadi 1.79 na accijns riba dje pa hisa e prijs te na 4,04 pa cada botter di 20 ons di refresco. Esaki ta un aumento di 80%. Den caso di e botternan di 2 liter di Coca Cola, esey ta costa awo 7 florin den supermercado. Lo inclui un accijns di 6.06 cen riba dje pa hisa e prijs final na 13,06 cen pa cada botter di 2 liter, pues un aumento di 87%.
E caso mas serio ta bin den e saconan cu ta uza na restaurant of barnan. E bag in a box ta contene 5 galon di refresco cu awor aki ta costa 142 florin pa saco. Ta bin un impuesto riba dje di 294 florin pa hisa e prijs for di 142 pa 436 florin pa cada saco di refresco. Esaki ta representa un aumento di 206%, cu tur consecuencia pa e aumento cu e lo tin riba cada bebida sirbi den un restaurant, cafe of bar riba nos isla.
Sugar tax … hasta si e no tin sucu!
Pero tin algo mas, aunke cu Gobierno ta yama e impuesto aki como un “Sugar Tax” toch no ta premia esunnan cu no ta bebe sucu. E leynan anticua cu Duana ta maneha, no ta haci distincion entre refresco normal y diet coke of coke 0. Pues aunke cu e producto no ta contene sucu, e impuesto ta conta riba dje tambe. Pues como consumidor lo bo paga Sugar Tax sea bo ta bebe refresco cu sucu of sin sucu.
Ley lo a costa cupo di trabou
Si e ley aki pasa, sin duda e lo tin un impacto riba prijs di refresco riba nos isla y pio ainda, e lo tin un impacto riba e unico planta di refresco na Aruba, esta Tropical Bottling Company cu lo hay’e ta reduci su operacionnan, costando cupo di trabou di nos mesun hendenan.
Ley no a pasa
Manera anticipa, e ley aki no a pasa pasobra no por a haya consenso politico den Parlamento di Aruba. No a ni yega na su tratamento, pasobra a bira conoci cu un gran mayoria den comunidad no tabata para su tras. Y a hinca e ley mesora den lachi y nunca mas no a tende di dje, te awor, cu Gobierno a bolbe trece padilanti relaciona cu comercio lo a boicotia e ley e tempo aya.
E idea no tabata malo
Pero esunnan cu tabatin di haber directamente cu e asunto, e tempo aya, a sigura cu e idea no tabata malo. Djis cu gobierno no tabata sincero den dje y tampoco a traha e ley na drechi. A enfoca mucho riba Coca Cola y Pepsi Cola, mientras cu e cantidad di productonan cu sucu ta hopi mas cu simplemente refresco. Y no semper sucu ta presenta den bebida, pasobra tin algun “cos dushi” cu tambe ta yena di sucu. Y loke sigur a bira un hilaridad, ta e hecho cu lo kier a cobra sugar tax hasta riba refresco SIN sucu, pues na final ta parce cu e nomber di e ley mes tabata robes, en bes di sugar tax, miho a hacie un softdrinks tax.
