A pesar di campaña y esfuerso pa mantene Aruba limpi, e problema di tiramento ilegal di desperdicio ta persisti, causando preocupacion entre e habitantenan di Seroe Biento 24, riba e camind’i tera.
E habitantenan di Seroe Biento ta expresa nan preocupacion p’e problema constante di tiramento ilegal di sushi den e area. A pesar di diferente campaña y esfuerso di e ciudadanonan pa mantene Aruba limpi, ainda tin persona cu ta tira desperdicio na luganan no autorisa, sin considera e daño cu esaki ta causa na medio ambiente.
E situacion a bira un problema cu ta keda ripiti, y e habitantenan ta pidi p’e autoridadnan concerni tuma medida mas fuerte pa evita cu e luga sigui ta uza como un dump ilegal. Entre e propuestanan cu ta menciona ta pa instala camara di vigilancia na punto strategico caminda e practica aki ta tuma luga, pa identifica y actua contra esnan cu ta incumpli e reglamentonan.
Ademas di pidi pa haci e area limpi, e habitantenan ta enfatisa cu limpiesa so no ta suficiente, pasobra despues di algun dia e desperdicionan ta bolbe aparece. Nan ta solicita medida preventivo y control mas estricto pa evita cu e problema sigui ripiti.
E yamada ta dirigi n’e instancianan responsabel pa no solamente atende e sushi cu ta acumula, sino tambe busca un solucion duradero pa proteha e medio ambiente y mantene e comunidad limpi.
