Parlamentario Shailiny Tromp-Lee ta expresa su preocupacion pa e situacion financiero di Hospital Ortopedico (HOH) y e impacto cu e crisis ta tin riba e calidad di cuido medico, trahadonan y comunidad. Den e luna aki, e investigacion di HOH ta yega na su fin. Tromp-Lee ta expresa e speransa cu, na cuminsamento di december, Gobierno lo tuma decision y anuncia accion concreto pa atende e situacion.
E situacion entre HOH, Gobierno y AZV
Segun Tromp-Lee, e pueblo a warda basta caba. E ta indica cu, segun informacion di HOH, desde februari 2026 e hospital a alerta riba su situacion financiero delicado y cu na maart a inicia combersacionnan cu directiva di UOAZV y e Minister. Dia 9 di juni, HOH a bolbe alerta y a presenta na Ministerraad su situacion financiero y e consecuencianan cu esaki ta trece.
Sinembargo, Minister Wyatt-Ras a indica cu ta na mei el a haya informacion di e situacion via AZV. Tromp-Lee ta señala cu no ta cla ken tin rason den e diferencia di versionnan, pero e crisis na HOH ta real y su impacto ta wordo sinti diariamente den comunidad.
Despues di e presentacion di dia 9 di juni, a inicia e proceso pa prepara y ehecuta un investigacion. Di juli te na fin di augustus a traha riba e opdracht di investigacion y na fin di augustus a firma e acuerdo di trabou. E investigacion a cuminsa na fin di september, cu un duracion di shete siman, y ta termina na november 2026.
Consecuencia di tardansa
Tromp-Lee ta reconoce cu e proceso di investigacion tabata necesario, pasobra Gobierno a indica cu mester tin informacion obhetivo y verificabel prome cu por tuma decision. Sinembargo, e ta enfatisa cu mientras e pueblo ta warda, e cuido medico ta sufri.
Segun e parlamentario, pa dia un sala di operacion ta cera, servicio di endoscopia no ta funciona riba diasabra y tin remedi y material cu no por keda cumpra. Ademas, lista di espera pa operacion ta sigui crece. E situacion aki ta crea limitacionnan den e servicio di cuido y ta afecta su calidad, cu posibel consecuencia negativo pa e pashentnan.
Ainda no tin solucion duradero y sostenibel
Tromp-Lee ta señala cu hopi hende ta cuestiona e hecho cu den prensa ta wordo informa cu HOH a haya placa, mientras cu e situacion no ta mehora. Segun AZV, HOH a ricibi un total di 31 miyon florin na adelanto durante 2026, incluyendo e ultimo 15 miyon cu a wordo transferi dia 3 di november. AZV ta informa cu e adelantonan aki a cuminsa desde februari pa e hospital por sigui opera.
Di otro banda, HOH ta indica cu e ultimo 15 miyon no ta un adelanto, sino un pago parcial pa e servicio di cuido cu e hospital a brinda durante 2025. Ta trata di placa cu HOH tabata mester haya caba pa trabou cu a realisa aña pasa, mientras cu ainda no tin un acuerdo definitivo pa 2025. Ademas, HOH ta aclara cu e adelantonan no ta placa adicional, sino cu nan ta forma parti di e presupuesto actual.
Pa Tromp-Lee, independientemente di e definicion cu ta wordo uza, e punto principal ta cu HOH no a ricibi placa adicional. E hospital a haya un parti di su propio placa mas trempan y un parti di e pago pa servicio cu a brinda caba. Mientrastanto, e problema di fondo, esta cu e presupuesto no ta cubri e costo real di cuido, tumando na cuenta inflacion, aumento di prijs y crecemento den volumen di servicio, ainda no a wordo soluciona.
Pa colmo, segun HOH, AZV tin intencion di cuminsa desconta e adelantonan aki entrante december. Tromp-Lee ta advierti cu, si esey sosode sin un solucion definitivo, e hospital lo enfrenta atrobe dificultad pa cubri su gastonan.
Situacion di trahadonan di HOH
Tromp-Lee ta expresa tambe su preocupacion pa e situacion di e trahadonan di HOH, kende ta sigui traha diariamente cu menos recurso, mas presion y hopi incertidumbre. Segun e parlamentario, e trahadonan no tin claridad tocante e siguridad di nan empleo, pago di bonus y e posibel problema financiero cu december por trece.
A pesar di e circunstancianan, e personal ta sigui brinda cuido na pashentnan cu profesionalismo, pasenshi y dedicacion.
E parlamentario ta considera cu e trahadonan merece claridad, respet y un ambiente di trabou stabiel, caminda nan por sigui desempeña nan funcion cu dignidad. Segun e, no por sigui pidi tur esfuerso di e personal sin ofrece nan e siguridad cu nan merece. Pa Tromp-Lee, e trahadonan merece mas cu palabranan; nan merece decision y accion.
Tromp-Lee ta pidi Gobierno pa tuma decision pronto
Den su declaracion, Tromp-Lee ta aclara cu e no ta indica cua decision Gobierno mester tuma, pasobra esey ta responsabilidad di Gobierno, AZV y HOH, a base di e resultadonan di e investigacion.
Sinembargo, e ta haci un yamada firme pa tuma accion y decision pronto. Segun e parlamentario, ta inaceptabel pa cuminsa aña 2027 sin claridad ni decision, specialmente teniendo cuenta cu AZV tin intencion di cuminsa desconta e adelantonan desde december.
Tromp-Lee ta expresa e speransa cu na cuminsamento di december e problema por haya un solucion, enfatizando cu e tempo di warda a caba y cu salud no por sigui warda mas.