Awe, diahuebs 19 di november, ta Dia Internacional di Hende Homber. E conmemoracion, cu a cuminsa na Trinidad y Tobago na aña 1999, ta marca awendia den mas di 80 pais. Pa su di 28 edicion, e organisadonan internacional a scoge e tema “The Future Is Everyone”, cu na Papiamento por traduci como “Futuro ta di tur hende”.
Un iniciativa cu raiz den Caribe
Dr. Jerome Teelucksingh, docente di historia na University of the West Indies, a lansa e conmemoracion riba 19 di november 1999 na Trinidad y Tobago. Un di su motivacionnan principal tabata pa duna mas visibilidad na hende homber cu ta sirbi como bon ehempel den bida diario. E idea tabata pa reconoce e contribucion di hende homber den cria yiu, den famia y den comunidad.
E conmemoracion tin seis pilar. Nan ta inclui promove ehempelnan positivo, reconoce e contribucion di hende homber, pone atencion riba nan salud y bienestar, visibilisa discriminacion cu nan por enfrenta, promove igualdad entre hende homber y hende muhe, y traha pa un sociedad mas sigur unda tur hende por desaroya nan potencial.
Futuro ta di tur hende
Cu e tema di 2026, e organisadonan ta invita henter comunidad pa participa den e combersacion tocante bienestar di hende homber y mucha homber. Den practica, esaki por cuminsa na cas, na scol of na trabou, dunando espacio pa papia di presion, di salud mental y di e sosten cu un persona mester ora e ta pasa den un momento dificil. E tema tambe ta reconoce e papel di hende homber den e cuido di yiu y den e trabou comparti pa construi un sociedad mas igual.
Na Aruba: Salud di hende homber ta riba agenda
Segun Centraal Bureau voor de Statistiek (CBS) y Censo, na final di aña 2025 Aruba tabatin 52.359 residente di sexo masculino, incluyendo adulto y menor di edad. Esaki tabata cerca di 47,3% di poblacion. E edad promedio di e grupo tabata 41,6 aña.
E luna aki, Aruba tin dos actividad local relaciona cu salud di hende homber. Diasabra 28 di november, di 10:00 di mainta te 12:00 di merdia, lo tin e simposio “Update Cancer di Prostaat 2026”, cu participacion di profesionalnan di urologia, oncologia, radioterapia y enfermeria. Diadomingo 29 di november, Fundacion Movemiento ta organisa un caminata na Alto Vista cu ta cuminsa pa 6:00 di mainta. E actividad ta busca stimula e comunidad pa incorpora mas movemento den su rutina diario.
Na Aruba, e dia ta brinda un oportunidad pa reconoce e hende homber cu ta dedica tempo na cria yiu, guia hoben, cuida famia y sirbi nan bario. Tambe ta un momento pa haci espacio pa un combersacion cu un tata, un yiu, un ruman of un amigo riba con e ta sinti su mes y ki sosten e mester.
Feliz Dia Internacional di Hende Homber na tur hende homber na Aruba.