E grupo di hendenan aki ta masha popular den ‘skimming’ di carchinan di ATM. Tanto Debit Card como tambe Credit Card nan ta manipula pa asina saca placa cu no ta di nan. Pa algun siman caba nan ta druk bezig y e biaha aki nan number a hunga danki na e tremendo trabou di recherche Oranjestad “DAR1”. Ta asina cu un banco local CMB a bati alarma riba loke e trio aki tabata bezig cune.
Nan a yega Aruba como un luna pasa y a duna adres robes. Nan a gaña e adres y asina mes den e proceso di investigacion a logra pone man riba nan den un cas na Madiki Kavel. A haya material cu ta ser usa pa ‘skimming’. Nan ta yega na un ATM y un ta drenta haci e instalacionnan necesario mientras cu e otro ta keda pafo.
E ta haci manera e ta den rij wardando beurt pa e tambe bay lanta placa. Asina nan ta opera pa pone nan ekipo pa copia tur detaye di un cliente y djey lanta su placa. CMB cu a bati alarma a facilita material na autoridad. CMB tin su mesun hendenan ta controla cada tanto rato cada ATM pa asina garantisa e seguridad di placa di nan clientenan. Di otro banda den e caso specifico aki no por a bisa mescos pa otro banco local. Tin un banco local cu tabata sa tur cos andando cu e placa di su clientenan y a scoge pa keda keto. No a bati alarma na autoridad. Parce e banco aki no tabata kier a haya mal fama pasobra ta ‘skimming’ su carchinan.
E actuacion aki no ta corecto pasobra asina e criminalnan aki lo a sigui cu nan fechorianan manera nada ta pasando. Autoridad ta contento cu e forma cu CMB a actua y asina nan por a move mesora pa pone man riba e tres Bulgaronan aki. No ta conoci cuanto placa a logra lanta. A base di e clientenan cu a sinti falta di placa riba nan cuenta, lo sigui acumula e sumanan. Na final lo presenta e total den corte. Hopi biaha bo ta haya e gruponan aki den Bulgaria, Brazil y Venezuela den pasado activo riba e operacionnan di ‘skimming’. Den e caso specifico aki tabata tres Bulgaro.
