E ekipo di 24ora.com ta na Colombia p’un biahe di trabou. Nos a bishita e centro “Con Animo” cu ta situa algun ora leu di Bogota, Colombia. Pa ta exacto na San Antonio del Tequendema, e ta un centro masha conoci pa hefe di operacion, Nelson Andrade.
Na 2022 el a bishita e centro na mas di un ocasion y a topa cu varios di nos yiunan di tera kendenan ta ricibiendo tratamento. E ta un centro di rehabilitacion cu nos propio yiu di tera, Jean Paul van der Kuyp ta propietario. Durante e bishita a topa cu algun pashent bek cu ya caba a topa na 2022, y por a mira un avance grandi den tur sentido di palabra.
Van der Kuyp a conta cu nan ta haci locual nan por y cada pashent bo tin cu trat’e segun su problema. E no ta problema di adiccion so, sino e ta bin compaña cu diferente otro reto, entre otro salud mental, depresion y mucho mas. P’esey e atencion personalisa ta asina importante.
E centro ta conta cu bon alimentacion, bon cuido, personal profesional pa atende cu tur pashent. Tin ora hasta ta sinti cu ey ta un miho luga pa esunnan cu ya ta completamente recupera, keda biba pa semper, mirando cu na Aruba e problema di droga ta grandi.
E programa no ta mara cu tempo, pero n’e persona cu tin problema di adiccion so, pues no tin reto cu salud mental etc, ta recomenda minimo seis luna. Actualmente tin bintitres Rubiano den Centro Con Animo, pa cual gran parti Pais Aruba ta cubri e gastonan.
Jean Paul ta di opinion cu tur mester bay bek Aruba un dia, pero si bo sa cu ora nan bay bek, nan lo cay den mesun problema ta miho laga nan den e centro. Aruba ta un luga chikito y e problema cu droga ta tur caminda. Di e bintitres Rubianonan, bintidos di nan tin contacto semanalmente cu famia, sigur dos bes pa siman. Pero si nan tin famia malo na Aruba, ta aceptabel pa yama tur dia.
Actualmente e centro tin bintiseis persona cu ta bibando eyden, pa cual bintitres di Aruba. Tin espacio pa diescuater persona ainda. Si tin persona interesa por contact Jean Paul van der Kuyp na (+57) 313 392 3339 of subi nan website; www.conanimo.org. Na final Jean Paul a enfatisa cu: “Adiccion no ta discrimina.”
E problema di accion nunca ta bay, bo tin cu siña atende cu e problema. Jean Paul van der Kuyp ta kere firme den e dicho “una bes un adicto, semper un adicto”, y e tin su motibonan pa cu esaki.
E pashentnan ta activo cu diferente actividad, entre nan deportivo, sauna y mucho mas. E programa ta tuma luga seis biaha pa siman y diadomingo ta liber. Riba nan dia liber por scoge pa wak Netflix, bay den pool of algo otro pero seis biaha pa siman e pashentnan tin cu participa activamente n’e programa.
Jean Paul mes t’ey tur dia n’e centro mirando cu e ta biba dilanti e centro. Privacidad ta cada persona ta importante y cada un tin su propio camber, no ta comparti cama of camber cu otro pashent.
Tocante Jean Paul van der Kuyp y Centro Con Animo
Jean Paul van der Kuyp ta un ex-adicto, e tin hopi aña “clean” caba. Despues cu el cuminsa biba un bida nobo, el a dedica su tempo na yuda otro, sali for di e mundo di adiccion. E ta propietario di un finca, cu el a converti den un centro di rehabilitacion bou nomber di Corporacion Con Animo.
Tur cos a cuminsa na aña 2008 ora cu Jean Paul van der Kuyp a yuda un pashent Hulandes sali for di e mundo di adiccion. E no tabata su plan pa atende cu personanan cu adiccion, sinembargo e pashent aki a keda cinco aña bou guia di Jean Paul, awe e ta sano y bibando un bida saludabel.
Mientras Jean Paul van der Kuyp tabata yuda e pashent Hulandes aki, el a ricibi mas peticion pa yuda mas hende. Na aña 2009 e tabatin como shete pashent, e tempo ey su finca tabata chikito compara cu awe. Na 2009 el a confirma su mes cu e lo dedica su bida na yuda otro sali for di adiccion, pa cual ta su trabou diario. Awendia e ta director di e organisacion profesional aki.
E finca ta situa na San Antonio del Tequendama, algun ora leu for di capital di Colombia, Bogota. El a converti su finca den un centro di adiccion, a construi mas edificio, pa cual na aña 2015 a logra cumpra e finca completo. Prome cu Jean Paul a ricibi pashent di Aruba, e tabata traha directo cu seguro na Colombia. Na dado momento e tabatin como diesshete Colombia den su organisacion.
Jean Paul van der Kuyp a sigui varios curso rond mundo relaciona cu adiccion. Finca Pa Que Mas ta consisti di dos cas pa hende homber y dos pa hende muhe. Cada pashent ta ricibi su camber apart. Na aña 2016 Jean Paul a ricibi e prome pashent di Aruba, e tempo ey bou maneho di ex-Minister Arthur Dowers. For di e tempo ey, un boca a keda bisa otro y awendia ta conta cu nuebe pashent cu gobierno di Aruba ta subsidia y e restonan ta priva, pero mayoria ta hende local di Aruba.
