Diasabra mainta alrededor di 9:00 am a pidi presencia di polis n’e T-kruising di Sero Alejandro na Savaneta, net na altura di Huang Bo Minimarket, cerca di e cas Savaneta # 219-E. Un auto marca Kia modelo Rio color blauw numera A-36413 biniendo for di pariba a bay dal straight den un cura di cas.
Na e sitio a tuma nota di un lastr’i brake, cu por conclui cu na e ultimo momento e chauffeur a purba reduci velocidad. Ora di tipo di accidentenan asina, unda ta baha caminda abruptamente y dal den mata of cura di cas of den pal’i luz, mesora ta lanta e sospecho cu por ta un caso cu e chauffeur a bira malo tras di stuur.
Ta trata di un homber di 56 aña di edad, naci na aña 1965, cu a bira malo tras di stuur y fayece. Famia na e sitio a identific’e como Tico Croes, cu ta biba na entrada di Yaraweg, na Savaneta. Pa 10:00 am dokter Textier a constata morto di e chauffeur. Daño material ta considerabel.
Pa siguridad, a notifica polis forensico y demas departamentonan concerci. No ta consider’e un accidente cu morto den trafico, p’esey mes dokter no a tuma e curpa den beslag.
Te na e momentonan aki ta keda un solo morto den trafico pa aña 2021, caminda un hoben riba brommer a perde su bida na e T-kruising di Adriaan Lacle Boulevard. A notifica famia tambe, cu un rato despues a presenta na sitio.
