Tur hende ta yega e dia cu nan tin di muri, sea gordo, flaco, rico , pober, homber , muher, politico, gobernante, solda, general, Rey, bon hende, mal hende, morto ta pa tur hende.
P’esey mescos cu door di un hende, pica a drenta den mundo, y morto door di pica, y asina morto a pasa pa tur hende, pasobra tur a peca.( Romanonan 5:12).
Morto Fisico: Ta nifica ora nos curpa no ta funciona mas, ora nos alma y spirito bandona nos curpa.
Esey ta e morto cu nos tur conoce, pa cual nos ta cera seguro di bida, y asina ora yega e momento cu nos fayece tur cos ta bon regla.
Pero tin un tipo di morto cu hopi no ta tene cuenta cu ne esey ta e: Morto Spiritual.
Morto Spiritual ta nifica: Un bida aleha y separa di Dios, den pica y no kier arepenti.
Hopi hende no kier comprende cu awor cu bo ta na bida, bo mester tin bon relacion, cu Dios, p’asina ora bo muri bo ta drenta shelo.
Nos tur ta nace separa di Dios, pasobra nos tur a nace for di relacion di homber y muhe, y ta p’esey nos tin e naturalesa di pica,cual ta bini for di Adam.
E unico cu no tin e naturalesa di pica ta Cristo Hesus pasobra E a wordo concebi door di Spirito Santo ( Lucas 1:26-35).
Dios den su inmenso amor pa mundo a duna su yiu unigenito ( Juan 3:16-19) pa ken cu kere den dj’E no bay perdi ma ricibi bida eterna.
Palabra di Dios ta bisa cu si bo kere den bo curason y confesa cu bo boca cu Cristo Hesus ta Señor lo bo ta salba.
Tin hopi prueba biblico di morto spiritual por ehempel: 2 Timoteo 3 vers 1-9 , Galationan 5 vers 19 -21 y 1 Corintionan 6:9 -10.
Pero Dios ta ofrece salida for di tur e picanan menciona e salida nos ta hañe den 1 Juan 1:9 y Salmo 103: 3+4). Nos tur tin e mesun oportunidad, pa drecha nos bida spiritual cu Dios.
Dios ta bisa cla den Efesionan 6:4 con mayornan mester lanta nan yiu, pasobra un mucha cu ta den rebeldia contra su mayornan , y no ta honra su mama y tata,ta spiritualmente morto y nos tur ta mira diariamente con diabel ta probecha di esey.
Cualkier persona cu ta cana bende droga, horta,atracado etc ta spirtualmente morto y mester arepenti y bini na Cristo Hesus.
Un persona den adulterio/ fornicacion, of otro tipo di inmoralidad sexual ta spirtualmente morto, y mester di arepenti, y bini na Cristo Hesus.
Un abusado di mucha ta spiritualmente morto, y mester arepenti , pasobra tipo di echonan asina ta completamente instiga door di satanas. Mester busca Señor.
Cualkier persona cu biba henter su bida riba e mundo aki, caminda tur dia bo ta tende, scucha, lesa y mira e palabra di Dios y keto bay ta keda cu un curason duro, critico, rechasando asina Dios y su palabra, of haci bofon mesclando idolatria, ciencia y inmoralidad pa asina evita di tur forma di somete y tin temor di Dios, lo conoce lo siguiente:
E di Dos morto:,
Esey ta e lago di candela pa esnan cu nan nomber no ta scirbi den e buki di bida esnan cu a rechasa e amor di Dios. Revelacion of e buki di Apocalipsis capitulo 20:11-15 ta splica bon cla di esey.
Dios tene misericordia.
Sinceramente , Pastor Marcel Balootje.
