Nos ta den un temporada cu pa otro siman, miles di hende lo ta riba caminda marduga, pa asina cuminsa asisti e misanan di Aurora, of tambe sigui esakinan via canalnan cu ta wordo transmiti.
Pader Daniel Szpila a splica cu tin cu remarca cu den Santa Iglesia tin e temponan fuerte, asina yama. Esaki ta tempo di cuaresma y tempo di Advent. E tempo di cuaresma ta permiti nos, of ta pusha nos pa nos regresa cerca Dios. Tempo di Advent ta pa Dios regresa cerca nos. Tempo di Cuaresma, ta pa nos regresa cerca Dios, Dios ta entrega su bida. Esaki ta permiti nos regreso cerca dje. Y tempo di Advent pa e regresa cerca nos, nos ta entrega nos bida na Dios. Nos ta haci nos bida bira un tera fertil pa palabra di Dios por cay den dje y por tira rais. Tempo di Advent, misanan di Aurora ta pertenece na tempo di Advent. Tempo di palabra di Dios. Palabra cu a bira carni. Palabra cu a nace for di Birgen Maria y a habita mey mey di nos, bira Emanuel, bira Dios cu Nos.
Esaki ta importante pa nos tuma na cuenta cu henter e tempo di Advent cu a cuminsa dia 3 di December ta pa permiti pa Dios regresa cerca nos y por regresa cerca nos por medio di su palabra, por regresa cerca nos si ta duna nos bida manera un tera fertil, pa su palabra por cay den dje y tira rais. Henter e tempo aki di Advent, incluyendo misanan di Aurora, ta tempo pa lanta for di soña.
Tin biaha e bida mes ta keda reduci na un soño y den soño bo no tin acto di boluntad, bo no tin reflexion, bo no ta dicidi di nada. E soño mes ta desaroya manera e kier y asina sa sosode tambe cu bida di hende ora cu nan ta reduci na un soño. Por ta un soño suave di egoismo, un soño di fantasia, di materialismo, di consumo. E por ta un soño erotico, di adulterio, di fornicasion. E por ta un pesadilla. Manera esun cu Aruba a biba ultimamente. Un pesadilla cu a sacudi henter nos pueblo. Un bida troca den un pesadilla. Un pesadilla cu a involucra nos sociedad den tristesa. Den tempo di advent kier lanta nos for di soño y no reduci nos bida na un soño inconciente. No laga situacionnan circunstancianan, personanan pushabo unda nan kier pa bo no ta manera un blachi seco den biento, sino pa bo lanta for di soño. Pa bo biba concientemente cu reflexion, cu actonan di boluntad pa bo scoge cu curashi loke ta bon, rechasa tambe cu fortalesa, loke ta malo. Biba un bida berdadero, un bida yen di gracia di Dios, di bendicion di Dios, cu por yena bo curason cu un gran satisfaccion, cu un berdadero bienestar y felicidad. Esey ta un gran oportunidad. Tempo di Advent ta un gran oportunidad cu Dios ta duna nos pa nos lanta for di soño. Pasobra tempo di Advent ta tempo di paso di Dios. Ta yega cerca y Dios ta bati na porta, manera ta bisa den Santa Scritura: Esun cu habri pami, y lo mi sinta hunto cun’e. E expresion aki di sinta hunto cun’e, ta un expresion cu ta papia di amistad. Ta papia di familiaridad. Dios kier comparti cubo, e kier sinta cubo, combersa cubo, kier tende tambe di bo. E kier cera un intimidad, un berdadero intimidad cu cada curason cu cada persona, cu cada famia. Esaki ta e tempo. Tempo di Emmanuel, di Dios cu nos. Tempo di paso di Dios. Ta yega cerca di cada cas, cerca di cada famia. Dios ta bati na porta mescos cu Mama Maria y San Jose ta bati na porta na Bethlehem. Lamentablemente tur tabata cera pa nan. Asina ta e tempo di Advent aki.
