Cu mas of menos 40% di nos isla sin coriente, pa 9:50pm a presenta un fayo den central di coriente na WEB Aruba NV. Consecuentemente un boiler y e turbina di gas a cay afo. A tira tres liña importante di NV Elmar afo, cu a laga varios bario den scur. Tecniconan di nos compania nacional di distribucion di coriente a activa mesora y a bay na e substation na WEB, na Tanki Leendert y na Pos Abou.
For di ey a cuminsa reconecta suministro, segun cu WEB tabata hisa e cantidad disponibel pa cumpli cu demanda.
Tabatin tres tecnico di NV Elmar na e substation di Pos Abou, cu tabata den contacto constantemente cu WEB pa pocopoco distribui mas coriente, segun e carga tabata subi.
Aki ta experiencia ta conta di tecniconan, cu conoce e materia y sa con maneha un “brown out”.
Barionan afecta dor di Brown Out ta Palm Beach, Noord, Paradera, Santa Cruz, Pos Chikito, na tur casi 40% di nos isla a keda sin coriente.Na un principio WEB a pronostica cu lo dura mas of menos 2 ora pa recupera suministro, pero prome cu esey caba a cuminsa cu reconexion.
Prome cu tur cos a logra subi e turbina mas grandi cu a cay afo, di 20MW. Esey mesora a haci cu ELMAR a haya mas carga pa por a cumpli cu e demanda. Mientras cu e substation net pafo di WEB a maneha e coriente pa Santa Cruz y Pos Chikito, esun na Tanki Leendert y Pos Abou a distribui pa e demas barionan afecta.
Tocante Brownout
Ta uza e termino “Brownout” na momento cu tin un caida intencional of no intencional den suministro regular di coriente. Un brownout intencional ta aplicabel por ehempel na momento cu e red di distribucion ta hay’e obliga pa reduci e carga di coriente, specialmente den caso di un emergencia. Reduccion den voltahe por ta un efecto di un interupcion di un red di coriente. Sa pasa cu e planta di produccion ta hay’e forsa pa, na un ocasion asina, reduci e carga pa asina preveni un perdida total di coriente, conoci como “blackout”.
Varios fayo na WEB ultimamenteFayonan na WEB Aruba NV ta birando mas y mas y cu frecuencia ta desconecta suministro regular di coriente. Pa e ultimo lunanan, a tuma nota cu na mei, augustus y na september ainda tabatin fayo na WEB cu a causa cu barionan a keda sin coriente. Esaki banda di e hecho cu regularmente e compania ta invirtiendo den tecnologia moderno y aparatonan nobo pa precisamente garantisa mas y miho produccion y suministro di corientw confiabel na pueblo. Pero pa un motibo of otro coriente ta sigui bay demasiado regular ultimamente, demostrando cu ni cu aparatonan nobo, tin un problema structura den e planta di produccion di awa y coriente.
