Tin persona cu mester bay renoba nan cedula. Na momento cu nan a bay traha un cita na oficina di Registro Civil y Censo, nan a termina sorprendi cu pa november nan por haya uno. Esaki ta bini pa motibo cu ya caba oficina di Registro Civil y Censo tin un lista largo di cita pa cedula. Te cu awo oficina di Registro Civil y Censo tin registra 1230 cita.
Informacion cu nos di 24ora y TREMPAN a ricibi for di oficina di Registro Civil y Censo ta cu tur cos ta depende di e periodo y factor externo. N’e momentonan aki nan ta druk, pero esaki ta algo cu ta fluctua cu tempo. Hopi biaha ta tende cu hende ta keha riba e servicionan di e departamentonan di gobierno, pero esey no ta e caso di oficina di Registro Civil y Censo. Oficina di Registro Civil y Censo tin tur cos bon regla pa asina atende tur hende.
Tin biaha e slotnan di e productonan ta yena. Un ehempel ta door di schrijf uit. Esaki ta den periodo di beursalen. Na momento cu e beursalen mester schrijf uit, Registro Civil y Censo ta percura pa dedica un diaranson merdia na nan so.
Renobacion di paspoort
Oficina di Registro Civil y Censo ta premira cu na 2024 tambe lo ta uno druk pa nan. Ta kere cu e cantidad di peticion pa paspoort lo aumenta di 40% na 50%, cual ta un total di 12.200.
Motibo di e aumento ta debi cu na 2014 a cambia e periodo den cual un paspoort ta valido. Anteriormente, e validez di un paspoort tabata di cinco aña, pero desde 2014 esaki a cambia pa dies aña. Esey ta haci otro aña tin hopi persona cu mester bay renoba nan paspoort.
Proceso pa cedula
Renobacion di cedula tin su procedura y un di nan ta cuminsa na haci un cita. Di cual e mas lihe cu por haya ta dia 6 di november. Pero, ta importante pa semper sa kico tur bo mester bay cu ne.
Dia di renoba e cedula, mester tin esun cu a of ta bay caduca. E tin un costo di 50 florin. Pa por tin un cedula di Aruba, e persona mester ta inscribi.
Si bo a perde bo cedula y mester uno nobo, bo ta haci un cita y riba dia di esaki bo mester tin un rijbewijs of paspoort valido. Door cu a perde e cedula, e tin un costo di shen florin, pero si bo a perde esaki un di dos biaha tin un costo di dos shen florin. Sinembargo, si ta tres bes e prijs ta di cuater shen florin.
