Dialuna atardi un cantidad di taxista for di diferente asociacion y taxi central a topa otro pafor di Bestuurskantoor pa vocifera nan mal contento.
Un delegacion cu a representa e grupo disgusta a bay paden pa sinta cu Minister di Transporte. Un total di 8 representante a sinta pa casi dos ora cu Minister. For di November aña pasa tin un lista cu prijs nobo y ainda Gobierno no a aproba esaki. Minister Romero a pidi tempo pa studia e lista di prijs nobo pero luna di Juni a pasa y nada a sosode, segun taxistanan.
Hasta nan mester a firma e lista nobo dia 7 di Juni y minister un biaha mas a laga nan na caya. Den fin di siman DTP lo a circula carta den hotelnan pa tira bista riba tarifanan di taxi y adverti e huespednan di esaki, accion cu no a cay den bon tera cerca e taxistanan.
Taxistanan ta cansa di sinta man crusa warda riba diferente instancia y ta dicidido pa hisa e prijs mirando cu tur cos a subi. Por ehempel e tarifa fiho entre 7am pa 11pm di Aeropuerto pa High Rise ta 25$ ta bira 30$, pafor di oranan regular e lo aumenta cu solamente 3$.
Diadomingo atardi e representantenan di e taxistanan a haya invitacion pa bin un reunion cerca e mandatario encarga cu transporte publico ora cu e mandatario a ripara cu e taxistanan no ta laga gobierno tuma nan haci mas.
